ڕۆژی سێشەممە، ٢٥ی خاکەلێوە، لە ئەنجامی تەقینەوەی مینێکی چێنراو لە ناوچە سنوورییەکانی هەورامان، گەنجێکی خەڵکی گوندی بیارە بە سەختی بریندار بوو.
ڕووداوەکە لە بەرزاییەکانی "کەلی ئایشێ" ڕووی داوە، کە ناوچەیەکی شاخاوییە و دەکەوێتە سەر هێڵی سنووریی نێوان هەرێمی کوردستان و ئێران.
بەپێی زانیارییەکان، ئەو ناوچەیە بەهۆی پاشماوەکانی شەڕی هەشت ساڵەی نێوان ئێران و عێراق و هەروەها بەردەوامیی پرۆسەی مینڕێژکردنی نوێ لەلایەن هێزەکانی کۆماری ئیسلامیی ئێرانەوە، مەترسییەکی گەورەی لەسەر ژیانی هاووڵاتیان دروست کردووە.
هێزەکانی ڕێژیمی ئێران بە بیانووی کۆنترۆڵکردنی سنوورەکان، بە شێوەیەکی بەردەوام ناوچە مەدەنی و کوێستانەکانی کوردستان مینڕێژ دەکەن، ئەمەش ژینگەیەکی ترسناکی بۆ دانیشتووانی سنوورەکە و ئەو کەسانەی بۆ کار و گوزەران ڕوو لەو شاخانە دەکەن، خوڵقاندووە.
ساڵانە ژمارەیەکی بەرچاو لە خەڵک، بەتایبەت گەنجان و کاسبکارانی سنوور، دەبنە قوربانیی ئەم سیاسەتە و بەهۆی تەقینەوەی مینەوە یان گیانیان لەدەست دەدەن یان تووشی کەمئەندامیی هەمیشەیی دەبن.
کەمتەرخەمی لە پاککردنەوەی ناوچەکان و زیادکردنی ڕێژەی مینە چێنراوەکان، بووەتە هۆی ئەوەی کە هەورامان و ناوچە سنوورییەکانی دیکە وەک مەیدانی شەڕ بمێننەوە و ڕۆژانە هەڕەشە لە ئەمنییەتی گیانیی خەڵکی ناوچەکە بکەن.
