دۆناڵد ترامپ، سەرۆککۆماری ئەمریکا، ڕۆژی هەینی ٢٨ی خاکەلێوە، جەختی کردەوە کە هەر ڕێککەوتنێکی ئەگەری لەگەڵ ئێران، دەبێت بە تەواوی ببێتە هۆی کۆتاییهێنان بە بەرنامەی چەکە ئەتۆمییەکەی ئەو ئەو رێژیمە و هۆشداریشی دا کە لە ئەگەری پێکنەگەیشتن بە ڕێککەوتن، واشینگتۆن دەست بە هەنگاوی کردەیی دەکات.
ترامپ لە گفتوگۆیەکدا لەگەڵ هەواڵنێران لەنێو فڕۆکە وتی: "خاڵی سەرەکی ئەوەیە کە ئێران نابێت هەرگیز دەستی بە چەکی ئەتۆمی ڕابگات. ئەم بابەتە لە پێشینەی هەموو پرسەکانی دیکەدایە."
ناوبراو هەروەها ئاماژەی بە پرسی ئۆرانیۆمی پیتێنراوی ئاست بەرزی ئێران کرد و ئیدیعای ئەوەی کرد کە لە ئەگەری بەدیهاتنی ڕێککەوتن، ویلایەتە یەکگرتووەکان ئەو ماددانە وەردەگرێتەوە. بە وتەی ترامپ، ئەم پرۆسەیە لە ڕێگەی دانوستان و ڕێککەوتنی هاوبەشەوە ئەنجام دەدرێت.
سەرۆککۆماری ئەمریکا لە هەمان کاتدا هۆشداری دا کە لە ئەگەری شکستهێنانی دانوستانەکان، واشینگتۆن بە شێوەیەکی "نا دۆستانە" دەست بەسەر ئەو ماددانەدا دەگرێت.
ئەو هەروەها وتی: "ئەگەر لە ڕێگەی ڕێککەوتنەوە نەگەینە ئەنجام، بە شێوەیەکی دیکە بەدەستی دەهێنین، بەڵام لە هەر بارودۆخێکدا بێت ئەمە هەر ڕوو دەدات."
