فەرماندەیی ناوەندیی ئەمریکا (سنتکام) ڕایگەیاند کە هێزە دەریایییەکانیان کەشتییەکی بازرگانییان بە ناوی "توسکا" لە کار خستووە کە بە ئاڵای کۆماری ئیسلامیی ئێرانەوە هەوڵی دابوو گەمارۆی دەریایی بشکێنێت و بچێتە بەندەری عەباس.
بەپێی ڕاگەیەندراوی فەرمی سنتکام کە ڕۆژی یەکشەممە بڵاو کراوەتەوە، ناوگانی "ئێسپراوس" بۆ ماوەی شەش کاتژمێر هۆشداریی داوەتە کەشتییەکە، بەڵام دوای ئەوەی پێرسۆنیلی کەشتییەکە وەڵامی هۆشدارییەکانیان نەدایەوە، هێزەکانی ئەمریکا بە تەقەی تۆپخانە ماتۆری کەشتییەکەیان لە کار خست و لە ئێستاشدا ئەو کەشتییە لەژێر کۆنترۆڵی هێزەکانی ئەمریکادایە.
سنتکام ئاماژەی بەوەش کردووە کە لە سەرەتای دەستپێکردنی گەمارۆ دەریایییەکانەوە تا ئێستا، هێزەکانیان ڕێگرییان لە ٢٥ کەشتیی بازرگانی کردووە کە ویستوویانە گەمارۆکان پێشێل بکەن و ناچاریان کردوون بگەڕێنەوە بۆ بەندەرەکانی ئێران.
ئەم ئۆپەراسیۆنە نوێیە کە ڤیدیۆکەشی لە تۆڕی کۆمەڵایەتیی ئێکس بڵاوکراوەتەوە، نیشاندەری چڕبوونەوەی چاودێرییە دەریایییەکانی ئەمریکایە لە ناوچەکەدا و جەختکردنەوەیە لەسەر ڕێگریکردن لە هەر جۆرە هاتووچۆیەکی بازرگانی کە پێشێلکاریی یاساکانی گەمارۆ بێت.
