گیدۆ کرۆسێتۆ، وەزیری بەرگریی ئیتالیا لە وتووێژ لەگەڵ ڕۆژنامەی "الشرق الاوسط" ڕایگەیاند کە وڵاتەکەی دژی هەر جۆرە وەرگرتنی باج لە هاتوچۆی نێو گەرووی هۆرمۆزە.
کرۆسێتۆ بە جەختکردنەوە لەسەر پێبەندیی ئیتالیا بە یاسا نێودەوڵەتییەکانی دەریاکان، هۆشداری دا کە کردارەکانی تاران دەتوانێت ئەمنییەتی یەکێک لە گرنگترین ڕێڕەوەکانی وزەی جیهان بخاتە مەترسییەوە.
ناوبراو هەروەها باسی لە ئەگەری فراوانکردنی ئۆپەراسیۆنی "ئەسپیدس" بۆ نێو گەرووی هۆرمۆز کرد، بەڵام ڕوونی کردەوە کە وڵاتانی ئاسیایی بەهۆی پشتبەستنی زیاتریان بەم ڕێڕەوە، دەبێت ڕۆڵێکی بەرچاوتر لە دابینکردنی ئەمنییەتەکەیدا بگێڕن.
وەزیری بەرگریی ئیتالیا لە بەشێکی تری قسەکانیدا، بە ڕەخنەگرتن لە دۆخی نێوخۆی ئێران وتی، لاوازکردنی ڕەوتە سیاسی و مەدەنییەکان بووەتە هۆی ئەوەی کە لە کردەوەدا فەرماندەکانی سپای پاسدارانی کۆنترۆڵی کاروباری ئێران بگرنە دەست؛ دۆخێک کە بە وتەی ئەو، پرۆسەی دانوستانی ئاڵۆز کردووە و ئاسۆی گەیشتن بە ڕێککەوتنی ناڕوونتر کردووە.
