ئۆپەراسیۆنەکانی پشکنین و دەستبەسەرداگرتنی کەشتییەکان لەلایەن هێزەکانی ئەمریکاوە لە ئاوە هەرێمی و نێودەوڵەتییەکاندا، بووەتە هۆی دەستپێکردنی قۆناغێکی نوێی ڕووبەڕووبوونەوە لە نێوان واشنگتۆن و تاران؛ قۆناغێک کە تێیدا گوشاری دەریایی و ئابووری جێگەی پێکدادانی ڕاستەوخۆی گرتووەتەوە.
بەپێی ڕاپۆرتێکی ڕۆژنامەی "واڵ ستریت ژوورناڵ"، هێزە دەریاییەکانی ئەمریکا لە چوارچێوەی هەڵمەتێکی چڕدا، ئەو کەشتییانەی پەیوەندییان بە ئێرانەوە هەیە ڕادەگرن یان پشکنینیان بۆ دەکەن؛ ئەم هەنگاوەش بە ئامانجی سنووردارکردنی هەناردەی نەوتی ئێران و کەمکردنەوەی سەرچاوە داراییەکانی ئەو وڵاتە ناوزەد کراوە.
ڕاپۆرتەکە ئاماژە بەوە دەکات کە واشنگتۆن ئەم کارانە وەک بەشێک لە سیاسەتی "گوشاری زۆرینەی نوێ" دەبینێت کە جگە لە گەمارۆکان، ڕێڕەوەکانی کەشتیوانیی پەیوەندیدار بە ئێرانیشی کردووەتە ئامانج.
بە نووسینی ئەو ڕۆژنامەیە، ئەم ئۆپەراسیۆنانە بە بەکارهێنانی ناوگانەکانی شەڕ و هێزی سەربازی لە ناوچە هەستیارە دەریاییەکاندا ئەنجام دەدرێن، ئەمەش هاوکات لەگەڵ زیادبوونی گرژییەکان لە ناوچەکەدا، نیگەرانییەکانی سەبارەت بە ئەگەری پەرەسەندنی پێکدادانەکان زیاتر کردووە.
لە ڕاپۆرتەکەدا جەخت کراوەتەوە کە گۆڕینی سەرنج لە پێکدادانی ڕاستەوخۆوە بۆ گوشارخستنە سەر هێڵەکانی کەشتیوانی، نیشانەی چوونە نێو قۆناغێکی نوێی شەڕی ئابووری و ئەمنیی نێوان ئێران و ئەمریکایە؛ قۆناغێک کە تێیدا کۆنترۆڵکردنی ڕێڕەوەکانی وزە و بازرگانیی دەریایی بووەتە تەوەرەی سەرەکیی ململانێکان.
