باڵیۆزخانەی چین لە تاران بە بڵاوکردنەوەی بەیاننامەیەک داوای لە هاووڵاتییانی وڵاتەکەی کرد هەرچی زووترە ئێران جێبهێڵن و بۆ ناوچە ئارامەکان بڕۆن.
لەو بەیاننامەیەدا جەخت کراوەتەوە ئەو کەسانەی کە هێشتا لە ئێراندا دەمێننەوە، دەبێت لە نزیکبوونەوە لە شوێنە هەستیارەکان، لەوانە دامەزراوەکانی دەوڵەتی و سەربازییەکان خۆیان بپارێزن.
هەروەها داوا لە هاووڵاتییانی چینی کراوە لە ئەگەری ڕوودانی بارودۆخی نائاسایی، دەستبەجێ پەیوەندی بە بەرپرسانی نێوخۆییەوە بکەن و لە نوێنەرایەتییە دیپلۆماتییەکانی چین داوای یارمەتی بکەن.
ئەم هۆشدارییە لە کاتێکدا دەردەچێت کە پێکەن پێشتریش لە ڕێکەوتی ٨ی ڕەشەمە، ڕۆژێک پێش دەستپێکردنی ئۆپەراسیۆنی هاوبەشی ئەمریکا و ئیسرائیل دژی کۆماری ئیسلامی، هۆشدارییەکی هاوشێوەی بە هاووڵاتییانی خۆی کردبوو.
