بەپێی ڕاپۆرتی ماڵپەڕی "ئاکسیۆس"، ئێران لە ڕێگەی نێوبژیوانە پاکستانییەکانەوە پێشنیارێکی نوێی بۆ کردنەوەی گەرووی هۆرمۆز و کەمکردنەوەی گرژییە بەردەوامەکان لەگەڵ ئەمریکا پێشکەش کردووە.
بەپێی ئەم ڕاپۆرتە کە لە زاری بەرپرسێکی ئەمریکایی و دوو سەرچاوەی ئاگادارەوە بڵاوکراوەتەوە، پێشنیارەکە کەمکردنەوەی گرژییە دەریاییەکان و گواستنەوەی دانوستانە ئەتۆمییەکان بۆ قۆناغی داهاتوو لەخۆ دەگرێت.
لە بەرامبەردا، ئێران داوای لادانی ئەو سنووردارکردنانە دەکات کە خراونەتە سەر هاتووچۆ و دەستڕاگەیشتنی ئابووری پەیوەست بە ڕێڕەوە دەریاییەکان، لەوانە گەرووی هۆرمۆز؛ ئەو ڕێڕەوەی کە بەشێکی گرنگی هەناردەی وزەی جیهانی لێوە تێپەڕ دەبێت.
هاوکات، سەرچاوە ئاگادارەکان بە ئاکسیۆسیان ڕاگەیاندووە کە چاوەڕوان دەکرێت دۆناڵد ترامپ لە کۆبوونەوەی "ژووری بارودۆخە نائاساییەکان"دا لەگەڵ تیمی ئەمنییەتی میللیی وڵاتەکەی، بژاردەکانی بەردەم ئەمریکا بەرامبەر بە ئێران تاوتوێ بکات.
سەرەڕای ئەمەش، ترامپ پێشتر ڕایگەیاندبوو کە تا گەیشتن بە ڕێککەوتنێکی گشتگیر، گوشارە ئابوورییەکان و سنووردارکردنەکان دژی ئێران بەردەوام دەبن.
ئەم گۆڕانکارییانە لە کاتێکدا بڵاو دەبنەوە کە گرژییەکان لە کەنداو و ڕێڕەوەکانی کەشتیوانیی ناوچەکەدا بەردەوامن و نیگەرانییەکان سەبارەت بە ئەمنییەتی وزەی جیهانی زیاتر بووە.
