کێشەکانی نێوان ئێران و ئەمریکا چووەتە قۆناغێکی ئاڵۆزەوە کە هاوشێوەی "جەنگی ساردی نوێ"یە؛ قۆناغێک کە تێیدا نە ڕێککەوتنی سیاسی دیارە و نە شەڕێکی گشتگیر، بەڵکوو بەرەوڕووبوونەوەیەکی پڕشینگ و درێژخایەنە.
بەپێی ڕاپۆرتێکی شیکاریی ماڵپەڕی "ئاکسیۆس" کە لەلایەن مارک کاپۆتۆ و باراک ڕاڤید نووسراوە، ئەم بنبەستە سیاسی و سەربازییە ڕەنگە بۆ ماوەی چەندین مانگ بەردەوام بێت. ئەم دۆخە بووەتە هۆی بەرزبوونەوەی نرخی وزە و ناسەقامگیری لە بازاڕە جیهانییەکاندا، هاوکات نیگەرانییەکانیش لە ئەگەری سەرهەڵدانی پێکدادانی سەربازیی کتوپڕ زیادیان کردووە.
بەرپرسانی ئەمریکایی نیگەرانی خۆیان لە دروستبوونی دۆخێکی بەستوو، بەڵام پڕگرژی دردەبڕن ؛ دۆخێک کە تێیدا نە ڕێککەوتن دەکرێت و نە شەڕی گەورە ڕوو دەدات، بەڵام ئاستی هەڕەشەکان بە بەرزی دەمێنێتەوە. لەم سیناریۆیەدا، هێزە سەربازییەکانی ئەمریکا بۆ ماوەیەکی درێژتر لە ناوچەکەدا دەمێننەوە و ڕێڕەوە ئاوییەکان، بەتایبەت گەرووی هۆرمۆز، وەک خاڵێکی مەترسیدار دەمێننەوە.
ڕاپۆرتەکە ئاماژە بەوە دەکات کە سەرۆککۆماری ئەمریکا لە نێوان دوو بژاردەی قورسدایە:
١. بەردەوامیی گوشاری ئابووری: درێژەدان بە سیاسەتی "گوشاری زۆرینە" و زیادکردنی سزای نوێ بۆ ناچارکردنی تاران بۆ گەڕانەوە بۆ سەر مێزی دانوستان.
٢. بژاردەی سەربازیی سنووردار: ئەنجامدانی هێرشی سەربازیی ئامانجدار بۆ گۆڕینی هاوسەنگیی هێز و شکاندنی ئەم بنبەستە.
لە کاتێکدا واشنگتۆن سزاکانی گەیاندووەتە بەرزترین ئاست بۆ سنووردارکردنی هەناردەی نەوتی ئێران، تاران هەوڵ دەدات لە ڕێگەی دروستکردنی ئاستەنگ لە گەرووی هۆرمۆز و ڕێڕەوە دەریایییەکان، وەک کارتێکی گوشار بەرپەرچی گوشارەکان بداتەوە.
شیکەرەوەکان پێیان وایە کە گوشاری ئابووری بەتەنیا و بەبێ بوونی ڕێگەیەکی دیپلۆماسیی ڕوون، ڕەنگە نەبێتە هۆی گۆڕانکاریی سیاسیی خێرا، بەڵکوو تەنیا کێشەکە درێژخایەن دەکاتەوە. لە کۆتاییدا، ئەم ڕاپۆرتە دەری دەخات کە ململانێی ئێران و ئەمریکا لە قۆناغێکی پڕ لە ناڕوونی دایە و بەرەو ڕووبەڕووبوونەوەیەکی "پرتووکاوی" هەنگاو دەنێت کە تێیدا لایەنەکان چاوەڕێی هەڵەی یەکدی دەکەن.
