دۆناڵد ترامپ، سەرۆککۆماری ئەمریکا لە هەنگاوێکی نوێدا لە تۆڕی کۆمەڵایەتیی "ترووس سۆشاڵ" نەخشەیەکی بڵاو کردەوە کە تێیدا ناوی گەرووی هۆرمۆز بۆ "گەرووی ترامپ" گۆڕدراوە.
ترامپ پێشتریش لە وتارێکدا ئەم ناوەی بەکار هێنابوو و ڕایگەیاندبوو کە ئەمە هەڵە نییە و بە دەگمەن هەڵە دەکات.
ئەم هەنگاوە لە کاتێکدایە کە گەرووی هۆرمۆز وەک یەکێک لە زیندووترین ڕێڕەوەکانی گواستنەوەی وزە لە جیهاندا، ڕۆڵێکی یەکلاکەرەوەی لە هەناردەکردنی نەوت و گازی وڵاتانی ناوچەکەدا هەیە.
لە بارودۆخێکدا کە شەڕی ئەم دواییە بووەتە هۆی زیادبوونی نیگەرانییەکان سەبارەت بە ئەمنییەتی کەشتیوانی و سەقامگیریی دابینکردنی وزە، هەندێک لە شرۆڤەکاران ئەم کارەی ترامپ وەک بەشێک لە هەوڵێک بۆ کاریگەری دانان لەسەر ڕای گشتی و پێناسەکردنەوەی ڕۆڵی ئەمریکا لە هاوکێشە ژیۆپۆلیتیکییەکانی ناوچەکەدا هەڵدەسەنگێنن.
ئەمە لە کاتێکدایە کە بازاڕە جیهانییەکانی وزە هێشتا بەرامبەر بە گۆڕانکارییەکانی گەرووی هۆرمۆز هەستیارن و هەر جۆرە ناسەقامگیرییەک دەکرێت ببێتە هۆی هەڵبەز و دابەزێکی زۆر لە نرخی نەوتدا.
