بەپێی ڕاپۆرتەکان ڕۆژی هەینی ١٤ی خاکەلێوە، لانیکەم ٢٨ کەس لە ناوچەکانی باشووری ئێران لەلایەن هێزەکانی ڕێژیمەوە دەستبەسەر کراون.
میدیاکانی سەر بە کۆماری ئیسلامی ئەم کەسانەیان بە "پەیوەندی لەگەڵ ئەمریکا و ئیسرائیل"، "تۆڕبەندی" و "کردەوەی تیرۆریستی" تۆمەتبار کردووە؛ ئەو تۆمەتانەی کە لە ساڵانی ڕابردوودا چەندین جار لە دۆسییە ئەمنییەتی و سیاسییەکاندا بەکار هێنراون.
میدیا حکوومییەکان هەروەها ئیدعای ئەوە دەکەن کە هەندێک لەو کەسانە پەیوەندییان بە میدیاکانی دەرەوەی وڵات هەبووە، یان زانیارییان سەبارەت بە شوێنە هەستیارەکان ناردووە.
بەهۆی پچڕانی بەرفراوانی ئینتێرنێت و سنووردارکردنی دەستڕاگەیشتن بە زانیارییەکان، هیچ دەرفەتێک بۆ پشتڕاستکردنەوەی سەربەخۆیانەی ئەم ئیدعایانە لە ئارادا نییە.
نەبوونی زانیاریی ڕوون سەبارەت بە ناسنامەی دەستبەسەرکراوەکان، شوێنی ڕاگرتنیان و بێبەشبوونیان لە پارێزەر، گومان و ناڕوونییەکانی سەر ئەم دۆسیانەی زیاتر کردووە.
ئەم دەستبەسەرکردنانە لە کاتێکدایە کە ڕاپۆرتەکان باس لە بەردەوامیی پچڕانی ئینتێرنێت لە ناوچە جیاجیاکانی وڵات دەکەن، ئەمەش وای کردووە بنەماڵەی گیراوەکان و ناوەندەکانی مافی مرۆڤ بە زەحمەت بتوانن ئاگاداری دۆخی دەستبەسەرکراوەکان بن.
هاوکات لەگەڵ ئەم شەپۆلە نوێیەی دەستگیرکردن، ڕاپۆرتەکان باس لە جێبەجێکردنی سزای لەسێدارەدان و زیادبوونی گوشار بۆ سەر زیندانییانی سیاسی دەکەن.
ئەم گۆڕانکارییانە وێنای توندتربوونی کەشێکی ئەمنییەتی خنكێنەر لە وڵاتدا نیشان دەدەن؛ کەشێک کە تێیدا دەستبەسەرکردن، پچڕانی پەیوەندییەکان و گوشار بۆ سەر زیندانییان هاوکات ڕوویان لە زیادبوون کردووە.
