ناوەندی ئاماری ئێران لە نوێترین ڕاپۆرتی خۆیدا سەبارەت بە پێوەری نرخی بەکارهێنەر لە ڕەشەمەی ١٤٠٤دا ڕایگەیاندووە کە هەڵاوسانی خاڵ بە خاڵ گەیشتووەتە ٧١.٨ لەسەد و ئاستی گشتیی نرخەکان بە بەراورد بە ساڵی بنەڕەتی (١٤٠٠)، ۵.۴۲۳ قات بەرز بوونەتەوە.
بەپێی ئەم ڕاپۆرتە، هەڵاوسانی ساڵانە گەیشتووەتە ٥٠.٦ لەسەد کە بە بەراورد بە مانگی پێشوو زیادی کردووە و لەم نێوەدا، گرووپی خۆراک، خواردنەوە و تووتن زۆرترین گەشەیان بەخۆوە بینیوە و هەڵاوسانی خاڵ بە خاڵی ئەم کەرتە گەیشتووەتە ١١٢.٥ لەسەد.
لە ژێرگرووپە خۆراکییەکاندا، کەرەستەگەلێکی وەک ڕۆن و چەورییەکان بە ٢١٩ لەسەد، نان و دانەوێڵە بە ١٤٠ لەسەد و گۆشت بە ١٣٥ لەسەد، زۆرترین بەرزبوونەوەی نرخ و گەشەیان بە بەراورد بە هەمان ماوەی ساڵی ڕابردوو تۆمار کردووە.
هەروەها ڕاپۆرتی ناوەندی ئامار نیشانی دەدات کە هەڵاوسان لە ناوچە گوندنشینەکاندا بە ٨٦.٥ لەسەد، لە ناوچە شارنشینەکان زیاتر بووە و جیاوازیی هەڵاوسان لە نێوان چینە جیاوازەکانی داهاتیشدا زیادی کردووە.
بەردەوامیی بەرزبوونەوەی هەڵاوسان و گرانی، لەپاڵ زیادبوونی بێکاری و دۆخی شەڕدا، گوشارێکی یەکجار زۆری خستووەتە سەر ژیانی ڕۆژانەی خەڵک و بەرزبوونەوەی بەردەوامی نرخی کاڵا سەرەکییەکان و کەمبوونەوەی هەلی کار، بووەتە هۆی ئەوەی توانای کڕینی بنەماڵەکان بە شێوەیەکی بەرچاو دابەزێت و بەشێکی گەورەی کۆمەڵگا ڕووبەڕووی کێشەی دابینکردنی بژێوی ژیان ببنەوە.
