بەرپرسێکی سەربازیی ئیسرائیل ڕایگەیاند کە ئەرتەشی ئیسرائیل بەهۆی پەرەسەندنی ئاڵۆزییەکانی ئەم دواییەی ناوچەی کەنداو، لە ئامادەباشییەکی تەواودایە و بە وردی چاودێریی گۆڕانکارییەکان دەکات.
بەپێی ڕاپۆرتی هەواڵدەریی فەڕەنسە، ئەم بەرپرسە سەربازییە ڕۆژی دووشەممە ١٤ی بانەمەڕ ڕایگەیاندووە؛ دوای ئەوەی فەرماندەی سێنتکام هەواڵی تێکشکاندنی شەش بەلەمی ئێرانی و بەرپەرچدانەوەی چەندین مووشەکی ڕاگەیاند، هێزەکانی بەرگریی ئیسرائیل ئاستی ئامادەباشیی خۆیان پاراستووە.
لە بەیاننامەکەی ئەرتەشی ئیسرائیلدا هاتووە کە سیستمەکانی بەرگریی ئاسمانی و تواناکانی هێرشبەریی ئەم وڵاتە لە "بەرزترین ئاستی ئامادەباشی"دان. ئەم هەڵوێستە لە کاتێکدایە کە گرژییەکان لە ناوچەی کەنداو و گەرووی هۆرمۆز بەردەوامن و نیگەرانییەکان لە ئەگەری پەرەسەندنی زیاتری شەڕ و تێکهەڵچوونەکان ڕووی لە زیادبوون کردووە.
