پیت هێگسێت وەزیری شەڕی ئەمریکا، ڕۆژی سێشەممە ١٥ی بانەمەڕ، لە کۆنگرەیەکی ڕۆژنامەوانیدا هۆشدارییەکی توندی ئاراستەی تاران کرد و ڕایگەیاند کە هەر چەشنە هێرشێک بۆ سەر کەشتییە بازرگانییەکان، وڵامێکی "وێرانکەر و کوشندە"ی واشنگتۆنی لێ دەکەوێتەوە.
ناوبراو جەختی کردەوە کە گەرووی هۆرمۆز ئاوێکی نێودەوڵەتییە و ڕێژیمی ئێران بۆی نییە باج و سەرانە لە کەشتییەکان وەربگرێت یان کۆنترۆڵی بکات.
وەزیری شەڕی ئەمریکا ئاماژەی بە دەسپێکردنی ئۆپەراسیۆنی "پڕۆژەی ئازادی" کرد بۆ شکاندنی گەمارۆی سەر گەرووی هۆرمۆز و ڕایگەیاند کە هێزە دەریایی و ئاسمانییەکانی ئەمریکا بۆ دابینکردنی ئەمنییەتی هاتوچۆی کەشتییەکان"چەترێکی پارێزەری" گەورەیان بەسەر ناوچەکەدا کێشاوە.
هێگسێت وتیشی: "ئێمە شەش کەشتیی ئێرانیمان گێڕاوەتەوە و ڕێگریمان لێ کردوون کە هەوڵیان دابوو گەمارۆکە بشکێنن."
هاوکات ژەنراڵ "دەن کین"، بەرپرسی ستادی ئەرتەشی ئەمریکا، باسی لەوە کرد کە ڕێژیمی ئێران لە کاتی ڕاگەیاندنی ئاگربەستەوە تا ئێستا، ٩ جار تەقەی لە کەشتییە بازرگانییەکان کردووە و دەستی بەسەر دوو کەشتیی بارهەڵگریشدا گرتووە.
