بەپێی ڕاپۆرتە بڵاوکراوەکان، لانیکەم ٣٠ ژن کە لە ڕەوتی ناڕەزایەتییەکانی بەفرانبار و شەپۆلی دەستبەسەرکردنەکانی دوای ئاڵۆزییە سەربازییەکانی نێوان کۆماری ئیسلامی و ئەمریکا و ئیسرائیل دەستبەسەر کرابوون، لە بارودۆخێکی زۆر نالەباردا لە بەندیخانەی وەکیلئابادی مەشهد ڕاگیراون.
بەپێی ڕاپۆرتی هەواڵدەریی "هێرانا"، ٢٣ کەس لەم ژنانە لە بەندی "ئارامش" و ٧ کەسی دیکەیان لە بەشی "قەرەنتینە"ی ئەم بەندیخانەیەدا لەژێر گوشارێکی زۆردان.
هێرانا لە زاری زیندانییەکی تازە ئازادکراوەوە بڵاوی کردووەتەوە کە بەندی ئارامش لە سەرەتاییترین پێداویستییەکانی وەک تەهویە، کەرەستەی تەندروستی، ئاودەست، حەمام و تەنانەت تەختی خەوتن بێبەشە.
پێشتر ئەم بەندە وەک شوێنێکی سزادان بۆ زیندانییانی تاوانە مەترسیدارەکان بەکاردەهات، بەڵام ئێستا زیندانییانی سیاسی بە شێوەیەکی ناڕوون تێیدا ڕاگیراون.
ئەم دۆخە نالەبارە و بێبەشکردنی زیندانییانی سیاسی لە خزمەتگوزارییە پزیشکییەکان، نیگەرانیی زۆری ڕێکخراوەکانی مافی مرۆڤی لێ کەوتووەتەوە.
بەکارهێنانی ئەو بەندانە بۆ ڕاگرتنی چالاکانی سیاسی، بەشێکە لە سیاسەتی گوشار و ئەشکەنجەی دەروونیی کۆماری ئیسلامی بۆ سەر دەستبەسەرکراوانی خۆپێشاندانەکان و قۆناغی شەڕ.
