سەرەڕای هەبوونی ئاگربەستێکی لەرزۆک، ئاڵۆزییەکانی نێوان ویلایەتە یەکگرتووەکانی ئەمریکا و کۆماری ئیسلامیی ئێران لە گەرووی هۆرمۆز گەیشتووەتە ئاستێکی مەترسیدار.
بەپێی نوێترین هەڵسەنگاندنە هەواڵگرییەکانی ئەمریکا، تاران دەتوانێت بۆ ماوەی چەند مانگێکی دیکە لە بەرامبەر گەمارۆ دەریاییەکاندا خۆڕاگری بکات، ئەمەش ئەگەری درێژخایەنبوونی شەڕ و ناسەقامگیریی ناوچەکەی زیاتر کردووە.
هەواڵدەریی "ڕۆیتێرز" لە ڕاپۆرتێکدا ئاماژەی بەوە کردووە کە لە چەند ڕۆژی ڕابردوودا، گەرووی هۆرمۆز شایەتی توندترین پێکدادانی نێوان هێزە دەریاییەکانی ئەمریکا و ئێران بووە لە دوای ڕاگەیاندنی ئاگربەست لە مانگی ڕابردوودا.
ئەرتەشی ئەمریکا ڕایگەیاند کە ڕێگریی لە دوو کەشتیی ئێرانی کردووە کە ویستوویانە بچنە نێو بەندەرەکانی ئێران. لە بەرامبەردا، بەرپرسانی تاران، واشنگتۆن بە سەرکێشیی سەربازی و پێشێلکردنی ئاگربەست تۆمەتبار دەکەن و هۆشدارییان لە ئەگەری پەرەسەندنی زیاتری تێکهەڵچوونەکان داوە.
هاوکات لەگەڵ گرژییە دەریاییەکان، ئیمارات جارێکی دیکە کەوتە بەر هێرشی مووشەکی و درۆنیی ڕێژیمی ئێران و سیستمی بەرگریی ئاسمانیی ئیمارات توانیویەتی دوو مووشەکی بالستیک و سێ درۆن تێکبشکێنێت.
تاران بەردەوامە لە بە ئامانجگرتنی ئەو وڵاتانەی کە میوانداریی پێگە سەربازییەکانی ئەمریکا دەکەن، ئەمەش وەک کاردانەوەیەک بەرامبەر بە پڕۆژەی "ئازادی"ی واشنگتۆن بۆ پاراستنی کەشتیوانی لە ناوچەکەدایە.
لە لایەکی دیکەوە، مارکۆ ڕۆبیۆ، وەزیری دەرەوەی ئەمریکا ڕایگەیاندووە کە واشنگتۆن چاوەڕێی وڵامی فەرمیی تارانە بۆ پێشنیاری ئاشتی و کۆتاییهێنان بە شەڕ. لە کاتێکدا ئەمریکا داوای وڵامێکی جیددی دەکات، وەزارەتی دەرەوەی ئێران ڕایگەیاندووە کە هێشتا خەریکی لێکۆڵینەوەن لەو پێشنیارە.
هاوکات لەگەڵ ئەم هەوڵە دیپلۆماسییانە، وەزارەتی خەزێنەداریی ئەمریکا گەمارۆی نوێی بەسەر چەندین کۆمپانیای چینی و نێودەوڵەتیدا سەپاندووە کە هاوکاریی بەرنامە مووشەکی و دڕۆنییەکانی ئێرانیان کردووە.
داخرانی گەرووی هۆرمۆز کە ڕێڕەوی پێنج یەکی نەوتی جیهانە، بووەتە هۆی شڵەژانی بازاڕەکانی وزە و تێکدانی هاوسەنگیی ئابووریی نێودەوڵەتی، لە کاتێکدا کە کۆماری ئیسلامی ئەم ڕێڕەوە وەک کارتێکی گوشار دژی کۆمەڵگەی نێودەوڵەتی بەکار دەهێنێت.
