کۆماری ئیسلامیی ئێران لە ساتەوەختێکی زۆر هەستیاردا بۆ کۆتاییهێنان بە شەڕ، ڕووبەڕووی قەیرانی بڕیاردان بووەتەوە.
بەپێی ڕاپۆرتی ڕۆژنامەی "واڵ ستریت ژۆرناڵ"، موجتەبا خامنەیی، ڕێبەری نوێی ڕێژیم، لەو کاتەوەی لە هێرشەکەی مانگی ڕەشەمەدا بریندار بووە، لە بەرچاوی گشتی ونە و هیچ هەڵوێستێکی ڕوونی لەسەر دانوستانەکان دەرنەبڕیوە و ئەوە گومانی لەسەر توانای جەستەیی و کردەیی ئەو بۆ ئیدارەکردنی ڕێژیم و واژۆکردنی ڕێککەوتنە چارەنووسسازەکان دروست کردووە.
واڵ ستریت ژۆرناڵ ئاماژەی بەوە کردووە کە بەرپرسانی تاران هۆکاری ئەم ون بوونە بۆ پاراستنی ئەمنییەتی دەگێڕنەوە و دەڵێن ناوبراو هێشتا لە لیستی ئامانجەکانی ئیسرائیلدایە.
بەڵام لە بەرامبەردا، سەرچاوە هەواڵگرییەکانی ئەمریکا دەڵێن موجتەبا تووشی سووتانی زۆر بووە و لە گۆشەگیریدا لەژێر چارەسەردایە. ئەمە بووەتە هۆی ئەوەی کە بڕیاردانی ڕۆژانەی شەڕ و دانوستانەکان بکەوێتە دەستی فەرماندە باڵاکانی سپای پاسداران و محەممەدباقر قاڵیباف، سەرۆکی مەجلیسی ڕێژیم.
ئەم دۆخە ئاڵۆزەی نێو دەسەڵات، لایەنە نێودەوڵەتییەکانی تووشی سەرلێشێوان کردووە، چونکە ناتوانن دەستنیشانی بکەن کێ لە تاران خاوەنی دەسەڵاتی کۆتاییە بۆ بڕیاردان لەسەر ئاشتی.
لە کاتێکدا موجتەبا خامنەیی تەنیا ناوی ڕێبەری هەڵگرتووە، سپای پاسداران هێزی خۆی لە کایە سیاسییەکاندا زیاتر کردووە، ئەمەش وای کردووە پێکهاتەی بڕیاردان لە ئێراندا ببێتە نادیارترین و شاراوەترین قۆناغی خۆی لە مێژووی چەند دەیەی ڕابردوودا.
