بەپێی ڕاپۆرتە نێودەوڵەتییەکان، دۆناڵد ترامپ، سەرۆککۆماری ئەمریکا، وڵامە چەند لاپەڕەییەکەی ڕێژیمی ئێرانی بۆ کۆتاییهێنان بە شەڕ بە توندی ڕەت کردەوە و ئەم هەڵوێستەی واشنگتۆن ئاماژەیە بۆ بەردەوامیی بنبەستە سیاسییەکان و ئەگەری درێژەکێشانی شەڕ لە ناوچەکەدا.
ڕۆژنامەی "واڵ ستریت ژوورناڵ" ئاشکرای کردووە کە پێشنیارەکەی ئێران، کە لە ڕێگەی نێوبژیوانە پاکستانییەکانەوە پێشکەش کراوە، کێشە سەرەکییەکانی پەیوەندیدار بە بەرنامەی ناوکیی تارانی بە نادیاری هێشتووەتەوە.
ئێران لە جیاتی وڵامێکی ڕوون بۆ داواکارییەکانی ئەمریکا، پێشنیاری کردووە کە لە ماوەی ٣٠ ڕۆژی داهاتوودا وتووێژ لەسەر پرسی ئەتۆمی بکرێت و ئامادەیی نیشان داوە تەنیا بەشێک لە ئۆرانیۆمە پیتێنراوەکەی ڕوون بکاتەوە یان ڕەوانەی وڵاتێکی سێیەمی بکات، کە ئەمە لەگەڵ مەرجە پێشوەختەکانی واشنگتۆن ناتەبایە.
لەلایەکی دیکەوە، هەواڵدەریی "ڕۆیتێرز" ئاماژەی بەوە کردووە کە تاران لە وڵامەکەیدا جەختی لەسەر پێویستیی کۆتاییهێنان بە شەڕ لە هەموو بەرەکان و هەڵگرتنی گەمارۆ دەریاییەکانی سەر بەندەرەکانی ئێران کردووەتەوە.
هەروەها ئێران داوای گەرەنتیی کردووە بۆ ڕێگریکردن لە هەر هێرشێکی دووبارە و داوای کردووە سزاکانی پەیوەندیدار بە فرۆشتنی نەوت لە ماوەی مانگێکدا هەڵبگیرێن، بەڵام سووربوونی ئەمریکا لەسەر چارەسەرکردنی بنەڕەتیی پرسی ئەتۆمی پێش هەر ڕێککەوتنێک، وای کردووە کە ئەم پێشنیارە نوێیەی تاران نەبێتە هۆی کەمبوونەوەی گرژییەکان.
