بەپێی ڕاپۆرتی میدیاکانی لوبنان، گرووپی تێرۆریستیی حیزبوڵڵای لوبنان، منداڵان وەک ئامرازێک بۆ سیخوڕی و گواستنەوەی تەقەمەنی بەکار دێنێت. ئەم ڕەفتارە نیشاندەری هەمان ئەو سیاسەتە چەوتەیە کە ڕێژیمی کۆماری ئیسلامیی ئێران وەک سەرچاوەی سەرەکیی دارایی و ئیدیۆلۆژیی ئەم گرووپە، ساڵانێکە لە خزمەت ئامانجە سەربازی و سیاسییەکانی خۆیدا پەیڕەوی دەکات.
کاناڵی میدیایی "ئێمتیڤی"ی لوبنان لە ڕاپۆرتێکدا ئاشکرای کردووە کە حیزبوڵڵا بۆ پەروەردەکردنی "نەوەیەکی گوێڕایەڵ و ئامادەی مردن" سوود لە ڕێکخراوەکانی پێشەنگی خۆی وەردەگرێت.
بەپێی ئەم ڕاپۆرتە، ئەم منداڵانە کە زیاتر کوڕ و کچی چەکدارانی حیزبوڵڵان، لەلایەن ئەم گرووپەوە بۆ کاری سیخوڕی و گواستنەوەی تەقەمەنی و پێداویستیی سەربازی کەڵکیان لێ وەردەگیرێت.
ئەم کاناڵە لوبنانییە زیادی کردووە کە ژمارەیەکی زۆر لەم منداڵانە بە بیرۆکەی وەفاداری بۆ خومەینی و ئامانجەکانی ئەو پەروەردە دەکرێن.
بەکارهێنانی منداڵان لە شەڕدا، ڕەنگدانەوەی سیاسەتەکانی ڕێژیمی ئێرانە. کۆماری ئیسلامی کە حیزبوڵڵا بۆ ئامانجەکانی بەکار دێنێت، مێژوویەکی ڕەشی لەم بوارەدا هەیە؛ چ لە کاتی شەڕی عێراق و ئێراندا بە ناردنی هەزاران منداڵ بۆ سەر کێڵگەکانی مین و چ ئێستا لە ڕێگەی بەسیجەوە بۆ سەرکوتکاری و پڕوپاگەندە.
