ڕاپۆرتە مەیدانییەکانی نێوخۆی ئێران لە بانەمەڕی ١٤٠٥ نیشانی دەدەن کە بەهۆی هەڵاوسانی زیاتر لە ٢٠٠٪ی ماددە خۆراکییەکان، توانای کڕینی خەڵک بە تەواوی دابەزیوە و یارانەی سێ ملیۆن تمەنیی بنەماڵەیەکی سێ کەسی، تەنانەت تێچووی کڕینی تەنەکەیەک ڕۆنی پێنج کیلۆیی کە گەیشتووەتە ٣.٤ میلیۆن تمەن، دابین ناکات.
هاوکات لەگەڵ داڕمانی ژێرخانەکان، مەسعوود پزیشکیان، سەرۆککۆماری ڕێژیم، بەبێ پێشکەشکردنی هیچ ڕێگەچارەیەک، خەڵکی بە "زێدەڕۆیی" تۆمەتبار کردووە و داوای لێ کردوون "سەختییەکانی شەڕ" قەبووڵ بکەن.
ئەمە لە کاتێکدایە کە بەهای کاڵابەرگ لەنێوان ٦٠ بۆ ٧٠٪ دابەزیوە و گۆشتی مریشک و تهنانەت نان و بەستەنیش چەند هێندە گران بوون.
قەیرانی ئابووری کەرتی تەندروستیشی گرتووەتەوە؛ نرخی دەرمان تا ٣٨٠٪ بەرز بووەتەوە و تێچووی مانگانەی نەخۆشێکی شێرپەنجە گەیشتووەتە ١٠ میلیۆن تمەن.
نەبوونی دەرمان و گرانیی پشکنینەکان وای کردووە بەشێک لە هاووڵاتییان واز لە چارەسەر بهێنن یان بەهۆی بێپوولییەوە ددانەکانیان بکێشن.
کارەساتی دەرمان و گرانبوونی سەرسووڕهێنەری تێچووەکانی تەندروستی، سەلمێنەری ئەو ڕاستییەیە کە ڕێژیمی تاران مافی سەرەتایی ژیانی لە هاووڵاتییان زەوت کردووە و کۆمەڵگەی بەرەو فەوتانی گشتی دەبات.
