ڕێکخراوی فڕۆکەوانیی ئێران ڕۆژی هەینی لە ڕاگەیەندراوێکدا ڕایگەیاند کە هێڵی ئاسمانیی ڕۆژاوای ئێران بە شێوەیەکی کاتی داخراوە.
ئەم ڕاگەیەندراوە دوای ئەوە بڵاو کرایەوە کە هاوکات لەگەڵ هەوڵەکان بۆ دۆزینەوەی ڕێگەچارەیەکی دیپلۆماتیک و گەیشتن بە ڕێککەوتن لە نێوان ئێران و ئەمریکا، چەندین هەواڵیش سەبارەت بە ئامادەکاریی دووبارەی ئەرتەشی ئەمریکا بۆ ئەنجامدانی هێرشی نوێ لە دژی ئێران بڵاو بوونەتەوە.
بەپێی ڕاگەیەندراوی ڕێکخراوی فڕۆکەوانیی ئێران، مۆڵەتی سەرجەم گەشتە ئاسمانییە مەدەنییەکان لەو فڕۆکەخانانەی کە دەکەونە بەشی ڕۆژاوای ناوچەی زانیاریی گەشتە ئاسمانییەکانی تاران (FIR)، هەڵوەشاوەتەوە.
لە ئێستادا تەنیا هەشت فڕۆکەخانە، لەوانەش فڕۆکەخانەکانی مێهرئاباد، خومەینی، ئێسفەهان و یەزد ڕێگەیان پێدراوە چالاک بن.
لەو فڕۆکەخانانەشدا گەشتەکان تەنیا لە کاتی خۆرهەڵات تا خۆراوا ئەنجام دەدرێن و شیرکەتەکانی فڕۆکەوانی دەبێت بۆ هەر گەشتێک، مۆڵەتێکی نوێ لە ڕێکخراوی فڕۆکەوانیی وەربگرن.
