هێزە ئەمنییەکانی کۆماری ئیسلامیی ئێران لە پارێزگای لوڕستان، بە گازی فرمێسکڕێژ هێرشیان کردە سەر کۆبوونەوەی ناڕەزایەتیی قوتابییان.
بەپێی ڕاپۆرتەکان، ڕۆژی شەممە ٢ی جۆزەردانی ١٤٠٥ی هەتاوی، هێزەکانی ڕێژیم لە شارەکانی برووجێرد و خوڕماوا، لە کاتی دروشمدانی قوتابییانی ناڕازیدا، گازی فرمێسکڕێژیان هاویشتووەتە پاڵیان.
هاوکات لەگەڵ لوڕستان، شەپۆلی ناڕەزایەتیی قوتابییان پەرەی سەندووە و قوتابییانی پارێزگای کۆهگیلوویە و بۆیرئەحمەدیش بە ئەنجامدانی کۆبوونەوەی هاوشێوە هاتوونەتە ڕیزەکانی ئەم ناڕەزایەتییانەوە.
ئەم خۆپێشاندان و کۆبوونەوانەی قوتابییان لە دژی بڕیاری بەڕێوەچوونی تاقیکردنەوەکان بە شێوازی "حزووری" (ناوەندەکان) ئەنجام دەدرێت؛ ئەمەش دوای ئەوەیە کە چەندین مانگە پرۆسەی خوێندن لە قوتابخانەکاندا بەهۆی پشووەکان و پچڕانی بەردەوامەوە، ڕووبەڕووی کێشەی جیددی بووەتەوە.
