زیاتر لە دوو مانگە (٦٤ ڕۆژ) ڕێژیمی کۆماری ئیسلامی ئینتێرنێتی بە شێوەیەکی سەرتاسەری پچڕاندووە، ئەمەش بووەتە هۆی دروستبوونی قەیرانێکی قووڵی بژێوی و پەککەوتنی تەواوی کار و کاسبیی ئانلاین و خزمەتگوزارییە ڕۆژانەکانی هاووڵاتییان.
بەپێی ڕاپۆرتەکان، ئەمە یەکێکە لە درێژترین "خامۆشییە دیجیتاڵییەکان" لە مێژوودا، کە زیانێکی قورسی ئابووریی بە کاسبکارانی ئینتێرنێتی و چالاکانی بواری دیجیتاڵ گەیاندووە و بووەتە هۆی بێکاربوونی هەزاران کەس.
هاووڵاتییان دەڵێن پچڕانی ئینتێرنێت نەک هەر دەستڕاگەیشتنیان بە زانیارییە ئازادەکانی سنووردار کردووە، بەڵکوو بووەتە هۆی گرانبوونی بژێو، کەمبوونەوەی توانای کڕین و پەککەوتنی خزمەتگوزارییە پێویستەکانی وەک تاکسیی ئانلاین و سیستمی پارەدانی بانکی.
چاودێران پێیان وایە کۆماری ئیسلامی بە مەبەستی کۆنترۆڵکردنی زیاتری کۆمەڵگە و ڕێگریکردن لە بڵاوبوونەوەی زانیارییەکان، ئابووری و ژیانی هاووڵاتییانی کردووەتە قوربانیی سیاسەتە ئەمنییەکانی خۆی.
