دۆناڵد ترامپ، پێشبینی دەکات کە وڵاتەکەی دەتوانێت لە ماوەی دوو حەفتەی داهاتوودا "سەرکەوتنی تەواو" بەسەر کۆماری ئیسلامیی ئێراندا ڕابگەیەنێت و ڕاشیگەیاند کە دانوستانکارانی ئێرانی "ئامادەن هەموو شتێکمان پێبدەن".
ترامپ ئەم لێدوانانەی ئێوارەی دووشەممە ١٨ی خەرمانانی، لە کەمپەینێکی تلویزیۆنیدا بۆ پشتگیریکردن لە هەڵبژاردنەوەی سێناتۆر لیندسی گراهام بەربژێری کۆماریخوازەکان و پامێلا ئایوت بەربژێری پۆستی پارێزگار لە ویلایەتی کارۆلینای باشوور هێنایە بەر باس.
سەرۆککۆماری ئەمریکا جەختی لەوە کردەوە کە ئەمە سەرکەوتنێکی تەواو دەبێت کە بەم زووانە ڕوو دەدات و لە ئەنجامدا نرخی نەوت دادەبەزێت.
لە سەرەتای دەستپێکردنی شەڕەوە لە کۆتاییەکانی مانگی فێورییە، ترامپ چەندین جار پێشبینی جۆراوجۆری خستووەتە ڕوو کە بەپێی ئەوانە، ململانێی نێوان ئەمریکا و ئێران دەکرێت لە ماوەی چەند حەفتەیەکدا کۆتایی پێبێت.
تا ئێستا لە ئیسلام ئاباد چەند خولێکی دانوستان لە نێوان ئەمریکا و ئێراندا بەڕێوەچووە کە لە ئێستادا ڕاگیراون. دۆخی ئێستای وتووێژەکانی نێوان و ئەمریکا و کۆماری ئیسلامی هێشتا ناڕوونە.
هاوکات سەرۆککۆماری ئەمریکا داوای لە بێنیامین نێتانیاهوو، سەرۆکوەزیرانی ئیسرائیل کردووە کە کاتی زیاتر بۆ بەردەوامبوونی دانوستانەکانی ئەمریکا لەگەڵ کۆماری ئیسلامیدا تەرخان بکات.
