دۆناڵد ترامپ، سەرۆککۆماری ئەمریکا، ڕۆژی سێشەممە ٢٠ی جۆزەردان، لە پەیامێکی تونددا لە تۆڕی کۆمەڵایەتیی "ترووس سۆشیاڵ"، هێرشی کردە سەر سەرکردەکانی کۆماری ئیسلامیی ئێران و ڕایگەیاند کە ئەوان تەنیا "قسە دەکەن" و کاتی گونجاویان بۆ واژۆکردنی ڕێککەوتن لەدەست داوە.
ترامپ لە پۆستەکەیدا نووسیویەتی: "سپای ئێران بە تەواوی شێواوە و تێکچووە. بەشێکی زۆری، وەک هێزی دەریایی و ئاسمانییان، چیتر بوونیان نییە؛ ئەوان بە تەواوی شکستیان هێناوە."
ناوبراو هەروەها ڕایگەیاند: "ئێران تەنیا قسە دەکات و کار ناکات. سەرکێشی ڕۆژهەڵاتی نێوەڕاست مرد! ئەوان کاتێکی زۆریان بەفیڕۆ دا بۆ دانوستان لەسەر ڕێککەوتنێک کە بۆ خۆیان نایاب بوو، ئێستاش دەبێت باجەکەی بدەن."
ترامپ هەروەها لە چاوپێکەوتنێکی تایبەتدا لەگەڵ "تێری یێنگست"، پەیامنێری کاناڵی "فاکس نیوز" ڕایگەیاند، ئەگەری هەیە فەرمان بە ئەرتەشی وڵاتەکەی بکات کە لە ڕۆژی چوارشەممەوە وێستگەکانی بەرهەمهێنانی کارەبا و وزە و پردە سەرەکییەکانی نێوخۆی ئێران بکەنە ئامانج.
ترامپ پێشتر سەبارەت بە ڕێککەوتنەکە وتبووی کە گەیشتن بە ڕێککەوتنی کۆتایی لەگەڵ کۆماری ئیسلامی "کارێکی ئاسان نییە"، بەڵام هێشتا بە دووری نەزانیبوو کە لە ڕۆژانی داهاتوودا ڕێککەوتنێکی "زۆر باش" بێتە ئاراوە.
