بۆ دووەم ڕۆژی لەسەر یەک، هێرشە ئاسمانی و مووشەکییە هاوبەشەکانی نێوان ئەمریکا و کۆماری ئیسلامیی ئێران بە توندی بەردەوامن.
ئەرتەشی ئەمریکا ڕایگەیاندووە کە لە وڵامی هێرشەکانی تاران، چەندین بنکەی چاوەدێریی سەربازی، سیستەمی پەیوەندی و پێگەی بەرگریی ئاسمانیی لە نێوخۆی ئێراندا بۆردومان کردووە.
لە بەرامبەردا، سپای تێرۆریستیی پاسداران ڕایگەیاندووە کە بە شێوازێکی چڕ و بە بەکارهێنانی مووشەک و دڕۆن، هێرشی کردووەتە سەر ١٨ ئامانجی سەربازیی ئەمریکا لە بنکە ئاسمانییەکانی کوەیت، بەحرەین و بنکەی "ئەلئەزرەق" لە ئۆردۆن؛ هاوکات سیستمی بەرگری ئەو وڵاتانەش بەشێک لە هێرشەکانی ئێرانیان تێکشکاندووە.
لە کاتێکدا ئێران دەڵێت گەرووی هۆرمۆزی داخستووە و هێرشی کردووەتە سەر دوو کەشتیی ئەمریکایی، فەرماندەیی ناوەندیی ئەمریکا (سێنتکام) ئەم دەنگۆیانەی ڕەت کردووەتەوە.
پیت هێگسێت، وەزیری شەڕی ئەمریکا، ڕایگەیاندووە: "ئێمە بەتوندی لە ئێران دەدەین؛ ئەگەر پێویست بکات بە بۆمب دانوستان دەکەین بۆ ئەوەی ناچاریان بکەین ڕێککەوتنەکە واژۆ بکەن."
لەلایەکی ترەوە، شەڕ لە باشووری لوبنانیش لە نێوان ئیسرائیل و حیزبوڵڵای سەر بە ئێران بەردەوامە و لە دوایین هێرشی ئاسمانیی ئیسرائیلدا لانیکەم ١٣ کەس کوژراون.
مەرجەکانی تاران بۆ ڕێککەوتن بریتین لە: ڕاگرتنی هێرشەکانی ئیسرائیل بۆ سەر لوبنان، لادانی گەمارۆ ئابوورییەکان، ئازادکردنی پارە بلۆککراوەکانی و دانپێدانان بە کۆنترۆڵی ئێران بەسەر گەرووی هۆرمۆزدا؛ بەڵام دۆناڵد ترامپ پێداگری دەکات کە دەبێت ئێران کۆتایی بە گەمارۆی سەر گەرووی هۆرمۆز بهێنێت و دەستبەرداری پڕۆژە ئەتۆمییەکەی ببێت.
هەروەها بەهۆی ئەم ئاڵۆزییانەوە، نرخی نەوت لە بازاڕەکانی جیهاندا بە شێوەیەکی بەرچاو بەرز بووەتەوە.
