بەرپرسێکی باڵای وەزارەتی بەرگریی ئەمریکا (پێنتاگۆن) ڕایگەیاند، کە هێزەکانی وڵاتەکەی دوو دڕۆنی کۆماری ئیسلامیی ئێرانیان پاش هەوڵێکی ئاشکرا بۆ لێدانی کەشتییە بازرگانییەکان لە گەرووی هۆرمۆز خستووەتە خوارەوە.
ئەم گرژییە نوێیە شەوی پێنجشەممە لە کاتێکدا ڕووی دا کە دۆناڵد ترامپ، سەرۆککۆماری ئەمریکا، پێشتر گەشبینیی خۆی بۆ واژۆکردنی ڕێککەوتنێکی نزیک لەگەڵ تاران دەربڕیبوو و ڕایگەیاندبوو کە شەڕەکە بە کردەوە کۆتایی هاتووە.
بە وتەی ئەم بەرپرسە ئەمریکاییە: "پێدەچێت ئێران ئەمشەو هەوڵی دابێت هێرش بکاتە سەر ئەو کەشتییە بازرگانییانەی کە لە گەرووی هۆرمۆز تێدەپەڕن؛ لە بەرامبەردا هێزەکانی ئەمریکا دوو دڕۆنی خۆکوژی ئێرانییان تێکشکاندووە."
ئەم پەرەسەندنە سەربازییە تەنیا چەند کاتژمێرێک دوای لێدوانەکانی ترامپ بوو کە وتبووی لە چەند ڕۆژی داهاتوودا ڕێککەوتنەکە واژۆ دەکرێت و گەرووی هۆرمۆز وەک بەشێک لەو ڕێککەوتنە دەکرێتەوە.
سەرەڕای ئەم هێرشە سەرنەکەوتووانەی ڕێژیمی ئێران، ئەو بەرپرسەی ئەمریکا جەختی کردووەتەوە کە هاتوچۆی دەریایی و بازرگانی لەم گەرووە ستراتێژییەدا بە بەردەوامە.
