ڕۆژی چوارشەممە ٢٧ی جۆەزردان، شاندێکی هاوپەیمانیی حیزبەکانی کوردستانی ئێران سەردانی نووسینگەی یورگن هارت، وتەبێژی سیاسەتی دەرەوەی فراکسیۆنی پارلەمانی حیزبی دێمۆکرات مەسیحیی ئاڵمانیان کرد.
لەم دیدارەدا بەڕێزان مستەفا قازیزادە و نەرمین عوسمانی نوێنەری حیزبی دێموکرات بەشدار بوون و باسێکی تێرتەسەل لەسەر گۆڕانکارییە سیاسییەکان کرا.
شاندی ڕۆژهەڵاتی کوردستان سەرنجی لایەنی ئاڵمانیی بۆ سەر هەلومەرجی دژواری سیاسی، ئابووری و کۆمەڵایەتیی ئێران ڕاکێشا و دۆخی گەلی کوردی بەوردی شی کردەوە.
هاوکات تیشک خرایە سەر هێرشە مووشەکی و دڕۆنییە بەردەوامەکانی کۆماری ئیسلامی بۆ سەر بنکە و بارەگاکانی هێزە سیاسییەکانی کوردستان و دواتریش ڕوانگەی هاوپەیمانی بۆ داهاتووی ئێران خرایە ڕوو؛ داهاتوویەک کە تێیدا مافی مرۆڤ، ئازادی و مافی نەتەوە جیاوازەکان لەسەر بنەمای بەها دێموکراتیکەکان پارێزراو بێت.
یورگن هارت وێڕای ستایشکردنی پێگەی سیاسی، کاریگەری و توانای ڕێکخراوەیی هێزە کوردییەکان، پێگەی کوردی لە هاوکێشەکاندا بە گرنگ نرخاند. ناوبراو بۆ چەسپاندنی سەروەریی یاسا و مافی مرۆڤ جەختی لە پێویستیی گفتوگۆ لەگەڵ هێزە دێموکراتیکەکانی دیکەی ئێران کردەوە.
لە کۆتاییدا هەردوو لایەن لەسەر بەردەوامیی ئەم چاوپێکەوتنانە و پتەوکردنی پێوەندییەکانی نێوانیان جەختیان کردەوە.
