دێن هافمەن، بەرپرسی پێشووی نووسینگەی ڕێکخراوی زانیاریی ناوەندیی ئەمریکا (CIA)، ڕۆژی شەممە هۆشداریی دا کە حیزبوڵڵای لوبنان سەرەڕای دانوستانە بەردەوامەکان لەگەڵ ئێران، هێشتا وەک هەڕەشەیەکی بەرچاو بۆ سەر بەرژەوەندییەکانی ئیسرائیل و ئەمریکا لە ڕۆژهەڵاتی نێوەڕاستدا دەمێنێتەوە.
هافمەن لە بەرنامەی تلویزیۆنیی "ژیان، ئازادی و لێڤین"دا ڕایگەیاند کە حیزبوڵڵا یەکێکە لە ئامرازە سەرەکییەکانی کۆماری ئیسلامیی ئێران بۆ سەپاندنی دەسەڵات لە ناوچەکەدا و وتی: "ئێران حیزبوڵڵا، حوسییەکان و میلیشیا نیابەتییەکانی خۆی لە عێراق بۆ پەرەپێدانی دەسەڵاتی لە ناوچەکە و دەرەوەی ناوچەکەدا بەکار هێناوە."
ئەم بەرپرسەی پێشووی سی ئای ئەی جەختی کردەوە کە ڕەخنەی حیزبوڵڵا لە لوبنان مەترسیی ئەمنییەتیی قورس بۆ سەر ئیسرائیل و هێزەکانی ئەمریکا لە ڕۆژهەڵاتی نێوەڕاست دروست دەکات.
ناوبراو هۆشداریی دا کە نابێت هیچ جۆرە ڕێککەوتنێک لەگەڵ ئێراندا، حیزبوڵڵا بخاتە دۆخێکەوە کە بتوانێت توانای سەربازیی خۆی سەر لە نوێ بونیاد بنێتەوە و پڕچەک بێتەوە.
ئەم لێدوانانە لە کاتێکدا بڵاو دەبنەوە کە سەرەڕای ڕێککەوتنی ئاگربەستی گرێدراو بە دانوستانەکانی نێوان ئەمریکا و ئێران، ئیسرائیل و حیزبوڵڵا هێشتا لە هێرشەکانیان لەدژی یەکتری بەردەوامن.
