فەرماندەیی ناوەندیی ئەرتەشی ئەمریکا (سێنتکام) ڕایگەیاند کە چەندین مووشەکی بالستیک و دڕۆنی ئێرانییان تەقاندووەتەوە و لە چوارچێوەی بەرگری لە خۆ و لە وڵامی هێرشەکانی تاران بنکەیەکی کۆنترۆڵی زەوینیی ئێرانیان لە دوورگەی قشم کردووەتە ئامانج.
بەپێی ڕاگەیەندراوی ئەمریکا، دوو مووشەکی ئاراستەکراو بۆ سەر کوەیت تێکشکاون و سێ مووشەکی دیکەش کە بەرەو بەحرەین تەقێندراون، لەلایەن پاتریۆتی ئەمریکا و بەحرەینەوە خراونەتە خوارەوە.
سێنتکام هەروەها ڕایگەیاند کە سێ درۆنی ئێرانیان کە ئاراستەی کەشتییە مەدەنییەکان کرابوون، تێکشکاندوون و لەم تێکهەڵچوونەدا هیچ سەربازێکی ئەمریکایی زیانی پێ نەگەیشتووە.
لە بەرامبەردا، سەرچاوەکانی ڕێژیم باسیان لە ڕوودانی لانیکەم سێ تەقینەوە لە کوەیت و پەککەوتنی سیستەمێکی بەرگریی ئەمریکا کردووە.
سپای پاسداران ڕایگەیاند کە بەهۆی پێکرانی دەکەڵێکی موخابەراتییان لە باشووری قشم، هێرشیان کردووەتە سەر بنکەی ناوگانی پێنجەمی هێزی دەریایی ئەمریکا و هۆشدارییان دا کە لە ئەگەری بەردەوامیی دەستدرێژییەکان، وڵامی داهاتوویان زۆر قورستر دەبێت.
سێنتکام جەختی کردەوە کە هێزەکانیان لە ماوەی ئاگربەستی ئێستادا لە ئامادەباشی تەواودا دەمێننەوە.
