بە هاتنی وەزی هاوین و چوونەسەرەوەی پلەکانی گەرما لە زۆربەی پارێزگاکانی کوردستان و ئێراندا کارەبا پچڕاوە و کەمیی ئاوی خواردنەوە تەنگی بە خەڵک هەڵچنیوە.
بەپێی ڤیدیۆی تۆڕە کۆمەڵایەتییەکان، لە پارێزگاکانی خووزستان، ئیلام، لوڕستان، تەورێز، ئەلبۆرز، تاران و چەند پارێزگایەکی دیکەدا لە ڕۆژدا چەندین کاتژمێر کارەبا دەپچڕێت و ئەوەش ناڕەزایەتیی خەڵکی لێ کەوتووەتەوە.
یەکێک لە بەکارهێنەرانی تۆڕە کۆمەڵایەتییەکان لە خووزستان وتوویەتی: "بە هاتنی وەرزی هاوین و چوونەسەرەوەی پلەی گەرما هەتا ٥٠ پلە، بەرنامەی پچڕانی کارەبا بڵاو کراوەتەوە".
هەروەها لە پارێزگای ئیلام سەرەڕای پلەی گەرمیی ٤٦، لە ڕۆژدا بۆ ماوەی ٤ کاتژمێر کارەبایان لێ دەبڕن.
هاووڵاتییەکی ئیلامی هۆشداریی داوە کە ئەگەر ئەو ڕەوتە بەردەوام بێت، ئەوا خەڵکی تووڕە و وەزاڵەهاتوو ناڕەزایەتییەکانیان پەرە پێ دەدەن.
هەروەها لە تاران و چەندین گەڕەکی ئەو شارەدا کەمیی ئاو و پچڕانی کارەبا ناڕەزایەتیی خەڵکی لێ کەوتووەتەوە.
هەروەها هاووڵاتییان باس لەوە دەکەن کە پچڕانی کارەبا و کەمیی ئاو لەکاتێکدایە کە نرخی هەرکامیان چەندین قات گران بووە.
ئەم جۆرە سیاسەتە چەوسێنەرانەی ڕێژیمی ئێران لە کاتێکدایە کە دۆخی بژێویی خەڵک بەهۆی بێکاری و هەڵاوسانەوە لەوپەڕی خراپیدایە و ئەم هەنگاوانەش وەک هەوڵێک بۆ قەرەبووکردنەوەی کورتهێنانی بودجەی دەوڵەت لە گیرفانی خەڵکی هەژار و کەمداهات دەبینرێت.
ئێران لە بواری سامانە سروشتی و سەرچاوەی ئاوییەوە بە یەکێک لە دەوڵەمەندترین وڵاتانی جیهان لە قەڵەم دەدرێت، بەڵام بەهۆی ناکارامیی بەڕێوەبەرانی ڕێژیمەوە دەیان قەیرانی لەو چەشنە بەرۆکی خەڵکی گرتووە.
