بێنیامین نێتانیاهوو، سەرۆکوەزیرانی ئیسرائیل ڕایگەیاند کە پرۆسەی ئاوەدانکردنەوەی کەرتی غەززە تەنیا لە دوای هەڵوەشاندنەوەی پێکهاتەی سەربازی و داماڵینی چەک لە ناوچەکە دەست پێ دەکات.
ناوبراو ئاماژەی بەوە کرد کە ئیسرائیل لە ڕێگەی دروستکردنی ناوچەیەکی دابڕاوی ئەمنییەتی لە نێو غەززە، هەڕەشەکانی کەم کردووەتەوە و ئەمنییەتی بۆ شارۆچکەکانی دەوروبەری غەززە گەڕاندووەتەوە.
نێتانیاهوو وتیشی دانیشتووانی غەززە لە نێوان مانەوە یان چوونە دەرەوە ئازادن، بەڵام ئەمە نابێت ببێتە مەترسی بۆ سەر تێلاڤیڤ.
لەلایەکی دیکەوە، نێتانیاهوو تیشکی خستە سەر دۆخی لوبنان و جەختی کردەوە کە وڵاتەکەی ڕەوایی پێویستی بۆ مانەوە لە درێژایی هێڵی زەرد لە باشووری لوبنان بەدەست هێناوە.
ئەو ئاشکرای کرد کە دۆناڵد ترامپ، سەرۆککۆماری ئەمریکا بۆ ڕاگرتنی ئۆپەراسیۆنەکانیان دژی تونێلەکانی حیزبوڵڵا هیچ داوایەکی لێ نەکردوون.
بە وتەی نێتانیاهوو، حیزبوڵڵا تەنیا پێشوازی لە ڕێککەوتن لەگەڵ ئێران دەکات و هەمیشە پێبەندییەکانی بەرانبەر ئیسرائیل پێشێل دەکات.
ئەم لێدوانانە لە کاتێکدا دەدرێن کە مشتومڕە نێودەوڵەتییەکان لەسەر داهاتووی غەززە و چۆنیەتیی بەڕێوەبردنی بەردەوامن.
