بە گوێرەی زانیارییەکان، لە سەرەتای ئەم حەفتەوە هێزێکی زۆری ڕێژیم لە شارەکانی کوردستان بەتایبەت شنۆ و پیرانشار و لە ناوچە سنوورییەکاندا جێگیر کراون.
بەپێی هەواڵێک کە بە بەشی هەواڵی ناوەندی ڕاگەیاندنی حیزبی دێموکرات گەیشتووە، لە سەرەتای ئەم حەفتەوە هەتا ئێستا و بەتایبەت ڕۆژی سێشەممە ٢٣ی پووشپەڕ، جووڵەیەکی بەرچاو و چڕی هێزەکانی سپای تێرۆریستیی پاسداران لە ناوچە سنوورییەکانی ڕۆژهەڵاتی کوردستان بەتایبەت لە شنۆ و پیرانشار بیندراوە.
بەپێی زانیارییەکانی ئەو سەرچاوەیە، ئەو هێزەی ڕێژیم کەرەستەی سەربازیی قورسیان لەو ناوچانەدا جێگیر کردووە.
هەروەها سپای پاسداران هەڕەشەیان لە مەڕدارەکانی ئەو ناوچەیە کردووە و پێیان ڕاگەیاندوون کە دەبێت شوێنی خۆتان بەجێ بهێڵن.
هاوکات سەرچاوەیەکی دیکە ڕایگەیاند کە هێزەکانی ڕێژیم لە بۆکان لە ترسی هێرشی دووبارەی ئیسرائیل و ئەمریکا، شەوانە لەسەر شەقامەکان و یان دەوروبەری شاردا دەمێننەوە و ناوێرن بچنەوە بنکەکانیان.
