ڕاپۆرتە هەواڵگرییە نوێیەکان و داتا ماهوارەییەکان کە ماڵپەڕی "JFeed" بڵاوی کردوونەتەوە، ئاشکرای دەکەن کە کۆماری ئیسلامیی ئێران گۆڕانکاریی تاکتیکی و بەرگریی بەپەلەی لە قووڵایی دامەزراوە ئەتۆمییە هەستیارەکانی لە نەتەنز، فۆردۆ و ئێسفەهان ئەنجام داوە.
وێنەکان جێگیرکردنی ماشینی پشتیوانی، دروستکردنی بەربەستی جادەیی و پڕکردنەوەی دەروازەی تونێلە ژێرزەوینییەکانی بە خۆڵ نیشان دەدەن؛ هەنگاوێک کە بە ئامانجی پاراستنی کەرەستە ئەتۆمییەکان لە هێرشی ئاسمانی نراوە.
ئەگەرچی ئەو خۆڵ و خاشاکە تازە کۆکراوەیە، دەروازە گەورەکانی تونێلەکە بە تەواوی ناشارنەوە، بەڵام بە شێوازێکی ستراتێژی وا داندراون کە هاتوچۆی خێرای ئۆتۆمبێلەکانی پشتیوانی ئەستەم دەکەن.
ئەم جموجۆڵە بەرگرییانە هاوکاتن لەگەڵ توندبوونی لێدوانی بەرپرسانی ناوچەکە. یێسرائیل کاتس، وەزیری بەرگریی ئیسرائیل ڕایگەیاند: "ئێمە دوو جار ئێرانمان کردە ئامانج و ئەگەر پێویست بکات، بۆ جاری سێیەمیش هێرش دەکەینەوە."
لە بەرامبەردا، عەباس عێراقچی، وەزیری دەرەوەی ئێران داوای لە دۆناڵد ترامپ کرد هێزەکانی لە تێلاڤیڤ کۆنتڕۆڵ بکات، ئەگەرنا خۆیان وڵام دەدەنەوە.
