فەرانسە و بریتانیا ڕایانگەیاند کە لەگەڵ عومان گەیشتوونەتە ڕێککەوتنێک بۆ گەڕاندنەوەی ئەمنییەتی دەریاوانی لە گەرووی هۆرمۆز.
ئێمانوێل ماکرۆن، سەرۆککۆماری فەرانسە و کیێر ستارمێر، سەرۆکوەزیرانی بریتانیا، لە بەیاننامەیەکی هاوبەشدا ڕایانگەیاند کە بۆ گەرەنتییکردنی ئەمنییەتی ئاوە هەرێمییەکانی عومان بۆ کەشتیوانیی بازرگانی لەگەڵ مەسقەت هاوکاری دەکەن.
هەردوو سەرکردە جەختیان کردەوە کە گەرووی هۆرمۆز شادەمارێکی گرنگ بۆ ئابووریی جیهانە و ئامادەیی خۆیان نیشان دا کە لە کاتی پێویستدا، هێزێکی سەربازیی فرەنەتەوەیی بۆ پاراستنی ئازادیی هاتوچۆ لەم ڕێڕەوە ستراتێژییەدا جێگیر بکەن.
ئەم هەنگاوە لە پاش واژۆکردنی لێکتێگەیشتنی نێوان ئەمریکا و ئێران و بە مەبەستی جێگیرکردنی سەقامگیری لە ناوچەکەدایە.
هەروەها ستارمێر لەم حەفتەیەدا لەگەڵ سوڵتان هەیسەم بن تاریق، سوڵتانی عومان کۆ بووەوە و لەسەر بەردەوامیی هاوکارییەکان بۆ دڵنیاکردنەوەی پیشەسازیی کەشتیوانی و پشتگیریکردن لە تێپەڕبوونی ئەمنی کەشتییەکان لەم گەرووەدا ڕێک کەوتن.
