وڵاتانی ئەندام لە "ناوەندی بەرەنگاربوونەوەی دابینکردنی دارایی تێرۆریزم" بە هاوبەشی سزایان بەسەر ٥ دامەزراوە و ١٦ کەسی سەر بە حیزبوڵڵای لوبناندا سەپاند.
وەزارەتی خەزێنەداریی ئەمریکا ڕایگەیاند، ئەم هەنگاوە بە مەبەستی تێکدانی ژێرخانی دارایی ئەم گرووپە و پاراستنی سیستمی نێودەوڵەتی نراوە.
گرنگترین دامەزراوە سزادراوەکان بریتین لە "قەرزولحەسەن" و "بەیتولماڵ" کە وەک شادەماری دارایی و خەزێنەی نافەرمیی حیزبوڵڵا کار دەکەن.
قەرزولحەسەن لەژێر ناوی ڕێکخراوێکی غەیرە حکوومەتیدا، خزمەتگوزاریی هاوشێوەی بانک بۆ گواستنەوەی نایاسایی پارە و دابینکردنی چەک بەکار دەهێنێت.
لەنێو سزادراوەکاندا، ئەحمەد محەممەد یەزبەک (بەڕێوەبەری دارایی قەرزولحەسەن) و عەباس حەسەن غەریب دەبینرێن کە لە ڕێگەی هەژمارە سێبەرەکانەوە لە بانکەکانی لوبنان، لە ماوەی دەیەیەکدا زیاتر لە ٥٠٠ میلیۆن دۆلاریان بۆ حیزبوڵڵا گواستووەتەوە.
هەروەها ئیبراهیم عەلی زاهیر، سەرۆکی یەکەی ناوەندیی دارایی حیزبوڵڵا کە چاوەدێریی بودجەی گشتیی ئۆپەراسیۆنە نێوخۆیی و دەرەکییەکان دەکات، لەگەڵ دوو شیرکەتی ژمێریاری و قەرزدان بە ناوەکانی "ئەلخوبرا" و "تەسهیلاتی ئێس.ئەی.ئار.ئێڵ" خراونەتە لیستی ڕەشی سزاکانەوە.
ئەمە سێیەمین ڕێکاری بەکۆمەڵی ئەم ناوەندە لە دەوری دووەمی سەرۆکایەتیی دۆناڵد ترامپدایە کە بە هاوبەشی لەگەڵ وڵاتانی شۆرای هاوکاریی کەنداو جێبەجێ دەکرێت.
