هاوکات لەگەڵ بەردەوامیی گفتوگۆکانی نێوان ئەمریکا و ئێران لەسەر دووبارە کرانەوەی گەرووی هۆرمۆز، شارەزایەکی کاروباری ڕۆژهەڵاتی نێوەڕاست هۆشداریی دا کە ئامانجە ستراتێژییە درێژخایەنەکانی تاران بەبێ گۆڕانکاری ماونەتەوە.
نازی موعینییان، توێژەر لە پەیمانگەی ڕۆژهەڵاتی نێوەڕاست، لە چاوپێکەوتنێکدا لەگەڵ کاناڵی "فاکس نیوز" ڕایگەیاند، دەسەڵاتی ئینقلابی ئێران بەبێ گوێدانە پێشهاتە دیپلۆماسییە کورتخایەنەکان، هێشتا کەمکردنەوەی هەژموونی ئەمریکا بە ئامانجێکی ئیدیۆلۆژیی سەرەکیی خۆی دەزانێت.
موعینییان وتی: "ئێران وڵاتێکی ئینقلابییە؛ بەڵێندەرە بە لادان، کەمکردنەوە و لە کۆتاییدا لەنێوبردنی دەسەڵات و هەژموونی ئەمریکا لە ناوچەکە و سەرانسەری جیهاندا."
ناوبراو ئاماژەی بەوەش کرد، سەرکردەکانی ئێران بە ڕوانگەیەکی درێژخایەنەوە سەیری ململانێی خۆیان لەگەڵ ئەمریکا دەکەن و جەختی کردەوە کە ئەوان ئەم شەڕە بە ئیدیۆلۆژی دەبینن، نەک مامەڵەیەکی سیاسی.
موعینییان وتیشی: "ئەوان وەک شەڕێک لە نێوان چاکە و خراپە، لە نێوان قوربانیدەر و قوربانی و لە نێوان گەندەڵ و پاکدا سەیرێکی ئەم بابەتە دەکەن."
ئەم لێدوانانە لەکاتێکدا دەدرێن کە بەرپرسانی ئێران و ئەمریکا رایانگەیاندووە گفتوگۆکان لەسەر دووبارە کرانەوەی گەرووی هۆرمۆز لە ئەگەری ڕێککەوتن نزیک بوونەتەوە، تەنانەت لەگەڵ ئەوەی گرژییە سەربازییەکان و هێرشی گرووپە نیابەتییەکان لە سەرانسەری ناوچەکەدا بەردەوامە.
