وەزارەتی خەزێنەداری و وەزارەتی دەرەوەی ئەمریکا، زنجیرەیەک سزای نوێیان بەسەر تۆڕێکی بەرفراوانی شیرکەت، کەسایەتی و سەڕافییەکانی دراوی دیجیتاڵیدا سەپاند، کە تۆمەتبار بە گواستنەوەی سەدان میلیۆن دۆلار بۆ سیستەمی بانکیی سێبەری کۆماری ئیسلامیی ئێرانن.
بەپێی ڕاگەیەندراوی وەزارەتی دەرەوە، ئەم هەنگاوە ڕاستەوخۆ وڵامێکە بۆ هێرشەکانی تاران بۆ سەر کەشتییە بازرگانییەکان لە گەرووی هۆرمۆز.
لەم چوارچێوەیەدا، دوو سەڕافیی گەورەی دراوی دیجیتاڵی و چەندین شیرکەتی هاوشێوە لە وڵاتانی ئێمارات، هۆنگ کۆنگ و سەنگاپوور کراونەتە ئامانج کە هاوکاریی تارانیان کردووە بۆ تێپەڕاندنی سزاکان و سپی کردنەوەی داهاتی نەوت.
سکات بێسێنت، وەزیری خەزێنەداریی ئەمریکا ڕایگەیاند: "سیستەمی بانکیی سێبەری ئێران لەژێر گوشاری ئابووریدا بەرەو داڕمان دەچێت و هەر لایەنێک هاوکاریی ڕێژیم بکات، خۆی دەکاتە ئامانجی سزاکانمان."
هەروەها تامی پیگۆت، وتەبێژی وەزارەتی دەرەوە ڕایگەیاند کە ئەمریکا لە ڕێگریی دەستڕاگەیشتنی تاران بەو سەرچاوانەی کە بۆ هەڕەشەکردن لە دراوسێکان و کەشتییە بێتاوانەکان، پشتیوانیکردنی تێرۆریزم و بەرەوپێشبردنی ئامانجە ئەتۆمییەکانی بەکاریان دەهێنێت، بەردەوام دەبێت.
ئەمە هەشتەمین هەنگاوی دەوڵەتی ترامپە لەم ساڵدا لە چوارچێوەی هەڵمەتی "زۆرینەی گوشارەکان" دژی سیستەمی دارایی ئێران.
هاوکات بەرنامەی "پاداشت بۆ دادپەروەری" سەربە وەزارەتی دەرەوە، پاداشتی تا ١٥ میلیۆن دۆلاری دیاری کردووە بۆ هەر زانیارییەک کە ببێتە هۆی پەکخستنی سازوکارە داراییەکانی سپای تێرۆریستیی پاسداران.
جێی ئاماژەیە، ئەم سزایانە دەسبەسەرداگرتنی سەرمایەی ئەو کەس و شیرکەتانە لە ئەمریکا دەگرێتەوە و مامەڵەکردنی خەڵکی ئەمریکاییان لەگەڵدا قەدەغە دەکات.
