مایک پۆمپێئۆ، وەزیری دەرەوەی پێشووی ئەمریکا لە چاوپێکەوتنێکدا لەگەڵ کاناڵی "فاکس نیوز" ڕایگەیاند کە داواکارییەکانی کۆماری ئیسلامیی ئێران دەریدەخەن تاران تەنانەت لە قەبووڵکردنی ڕێککەوتنێکی ئاشتیی درێژخایەن لەگەڵ واشنگتۆن نزیکیش نییە.
بە پێی وتەکانی پۆمپێئۆ، کۆماری ئیسلامی دەیەوێت لە بەرەبەرەی هەڵبژاردنە ناوەندییەکانی ئەمریکادا ئاستەنگ بۆ پرۆسەی دانوستانەکان دروست بکات.
پۆمپێئۆ سەبارەت بە هەڵوێستی ئێران وتی: "ئێرانییەکان هێشتا ئامادە نین نەرمی بنوێنن؛ نەک لەبەر ئەوەی دانوستانکاری باش نین، بەڵکوو لەبەر ئەوەی بە هیچ شێوەیەک باوەڕیان بە ڕێککەوتن نییە. ئەوان چەتە و تێرۆریستن و دەیانەوێت ئیسرائیل و ئەمریکا لەناو ببەن."
وەزیری دەرەوەی پێشووی ئەمریکا ئاماژەی بەوەش کرد کە تاران باش دەزانێت هەڵبژاردن لە پێشەوەیە و بە تەواوی دەیەوێت دونالد ترامپ لەو هەڵبژاردنەدا شکست بهێنێت؛ چونکە هیچ سەرۆککۆمارێکی تر وەک ترامپ ئامادە نەبووە سپاکەیان تا ئەم ئاستە لاواز بکات.
لە کۆتاییدا پۆمپێئۆ داوای بەردەوامیی گەمارۆکانی بۆ زیادکردنی گوشار لەسەر ڕێژیمی ئێران کرد و وتی: "گەمارۆکان دەبێت بەردەوام بن؛ نەک بۆ گوشارخستنە سەر خەڵکی ئێران، بەڵکوو بۆ گوشارخستنە سەر خودی دەسەڵاتدارانی تاران."
