کانوونی پیشەییی مامۆستایانی ئێران ڕایگەیاند کە هاوکات لەگەڵ شەڕی دەرەکی، دەسەڵات شەڕێکی یەکلایەنەی دژی کۆمەڵگە و هێزە مەدەنییەکان دەستپێکردووە و لە ڕێگەی زۆرکردنی سێدارەکان، حوکمی قورس و دروستکردنی کەشی ترس، سەرکوتی مامۆستایان و چالاکوانانی پیشەیی بەشێوەیەکی بەرچاو زیاتر کردووە.
لە بەیاننامەکەدا هاتوو کە لە ڕەشەمەی ساڵی ڕابردووەوە تا ئێستا، زیاتر لە ٦٠ مامۆستا و چالاکوانی پیشەیی ڕووبەڕووی بانگکردن، دەسبەسەرکردن، دوورخستنەوە، دەرکردن و بێبەشکردن لە کار بوونەتەوە.
ئەو کانوونە ئاماژەی بە سەپاندنی حوکمی زیندان، دوورخستنەوە و دەرکردن بۆ چەندین چالاکوان کردووە، لەوانە ئیرەج تۆبەئی ها، کەوکەب بداغی، شوکروڵڵا ئەحمەدی، مەجید کەریمی، غیاس نێعمەتی، فرووغ خوسرەوی و جەواد لەعلمحەممەدی کە سەرەڕای ٢٣ ساڵ خزمەت لە کارەکەی دەر کراوە.
هەروەها بەیاننامەکە تیشکی خستووەتە سەر خراپیی دۆخی تەندروستیی مامۆستا زیندانییەکان لەوانە مەسعود فەرهیختە، ئەبولفەزل خۆران و ڕەزا ئەمانیفەر کە لە چاوەدێریی پزیشکی بێبەش کراون.
کانوونی مامۆستایانی ئێران جەختی کردەوە کە بەرگری لە بژێوی، داواکاریی پەروەردەی بەخۆڕایی و ئازادیی چالاکیی پیشەیی تاوان نین؛ هاوکات داوای ڕاگرتنی دەستبەجێی سەرکوتەکان، هەڵوەشاندنەوەی سەرجەم حوکمە دادوەری و ئیدارییەکان، ئازادکردنی بێمەرجی مامۆستایانی زیندانی و بەفەرمی ناسینی مافی کۆبوونەوەی ئاشتییانەی کرد.
