گۆڕانی باری ئابووریی ئێران و هەڵکشانی سەرسووڕهێنەری هەڵاوسان، هێزی کڕینی خەڵکی بەشێوەیەکی بەرچاو دابەزاندووە.
بەپێی ڕاپۆرتی هەواڵدەریی "سیئێنئێن"، بەرزبوونەوەی بێپێوانەی نرخەکان بازاڕەکانی تووشی سستبوونی تەواو کردووە؛ تا ئەو ئاستەی میوە و سەوزە لە مەیدانەکانی میوە و تەڕەباردا بێکڕیار ماونەتەوە.
بۆ نموونە، گەیشتنی نرخی یەک کاڵەک بۆ ٤٠٠ تا ٥٠٠ هەزار تمەن، نیشانەی ئەوەیە کڕینی پێداویستییە سەرەتاییەکانیش لە توانای زۆربەی هاووڵاتییاندا نەماوە.
سیاسەتە ئابوورییە هەڵەکانی کۆماری ئیسلامی و درێژەپێدانی ئاڵۆزییەکان، گوشاری قورسی خستووەتە سەر چینە مامناوەند و کەمداهاتەکان.
ئامارە فەرمییەکان دەریدەخەن کە نرخی خۆراک بە بەراورد لەگەڵ ساڵی ڕابردوو زیاتر لە دوو بەرانبەر بووە و کەرەستە بنەڕەتییەکانی وەک گۆشت، برنج، هێلکە و نان بوونەتە کاڵای تایبەت.
ئەوە لەکاتێکدایە کە تێچووی ژیانی بنەماڵەیەکی کرێکاری گەیشتووەتە ٩٠ میلیۆن تمەن و داهاتی زۆربەیان تەنانەت نیوەی ئەم ژمارەیەش نییە.
سەرەڕای ئەوەش، بازاڕەکانی دیکە و بەشەکانی هاوردەکردن بەهۆی کێشەی زنجیرەی دابینکردن و سزاکانەوە پەکیان کەوتووە.
خاڵیبوونی بازاڕەکان و نەبوونی کڕیار، بەڵگەی حاشاهەڵنەگری داڕمانی ژێرخانی ئابووری و شکستی ڕێژیمی ئێرانە لە بەڕێوەبردنی بژێویی سەرەتایی خەڵکدا.
