لە نوێترین نموونەی پێشێلکردنی بەرچاوی مافی کەمینە ئایینییەکان لەلایەن ڕیژیمی ئیسلامییەوە، کۆمەڵگەی جیهانیی بەهاییەکان ئاشکرای کرد کە هێزە بەناو ئەمنییەتییەکانی ڕێژیم لە حەوت پارێزگا هەڵیانکوتاوەتە سەر ماڵی هاووڵاتییانی بەهایی و دەستیان بەسەر کەلوپەلی کەسییاندا گرتووە.
لە ڕاگەیەندراوەکەدا هاتوو هێزە ئەمنییەتییەکان لە دیواری ماڵەکان سەرکەوتوون، دایک و باوکیان لە بەرچاوی منداڵە دوو ساڵانەکەیان دەسبەسەر کردووە، ئامێرەکانی مۆسیقایان زەوت کردووە و تەنانەت کیسە برنج و گوڵدانەکانیشیان پشکنیوە.
"سیمین فەهەندژ"، نوێنەری کۆمەڵگەی جیهانیی بەهایی لە ڕێکخراوی نەتەوە یەکگرتووەکان لە ژنێڤ، ئەم کردەوانەی بە "دزیی حکوومەتی لە ڕۆژی ڕووناکدا" ناو برد و ڕایگەیاند چوونی هێزەکان بۆ نێو ماڵەکان و بردنی زێڕ، ئەڵقەی هاوسەرگیری، ماشین و داراییەکانی خەڵک، هیچ ڕەوایەتییەکی یاسایی بەو کارە نادات.
ئەم ڕاگەیەندراوە لەکاتێکدایە کە پێشتریش چەندین ڕاپۆرت سەبارەت بە هەڵکوتانە سەر ماڵ و شوێنی کاری هاووڵاتییانی بەهایی و پشکنینی کەلوپەلە تایبەتەکانیان بڵاو کرابوویەوە.
ئەم شەپۆلە نوێیەی گوشار و تاڵانکردنی دارایی هاووڵاتییانی بەهایی لە شارە جیاوازەکانی ئێران، درێژەی سیاسەتی سیستەماتیکی کۆماری ئیسلامییە بۆ بێبەشکردنی کەمینە ئایینییەکان لە مافە سەرەتایی و ئابوورییەکانیان و سەپاندنی زیاتری سەرکوت بەسەریاندا.
