بەپێی خەمڵاندنی چالاکوانانی بازرگانی، تێچووی گواستنەوەی کەلوپەل بۆ ئێران بەپێی جۆری کەلوپەلەکە و ڕێڕەوەکەی، لە نێوان ٤ تا ٧ قات زیادی کردووە.
هۆکاری ئەم بەرزبوونەوەیە بۆ زیادکردنی بەربەستە دەریاییەکان، گۆڕینی بەناچاری ڕێڕەوە بازرگانییەکان و کەمیی توانای گواستنەوەی ڕێڕەوە جێگرەوەکان دەگەڕێتەوە.
عەلی ئیمامی، بەرپرسی ڕێکخراوی گەشەپێدانی بازرگانیی ڕێژیم ڕایگەیاند کانتێنێرێک پێشتر بە ٣ هەزار دۆلار لە چینەوە دەهات، بەڵام ئێستا بە وشکانی ١٢ هەزار و بە شەمەندەفەر ٩٥٠٠ دۆلاری تێدەچێت.
موجتەبا بەهاروەند، چالاکی لۆجستیک جەختی کردەوە گواستنەوە بە قەزاقستان، ئوزبەکستان و تورکمەنستاندا ٦ تا ٧ ئەوەندەی گواستنەوەی دەریایی تێدەچێت؛ هەروەها بەندەری کەراچی تووشی ئاستەنگی ئەمنییەتی و ڕێگاوبان بووەتەوە.
خورشید گەزدرازی، بەرپرسی ژووری بازرگانیی بووشێهر ئاماژەی بەوەدا عومان نەیتوانی ببێتە جێگرەوەی ئیمارات و تێچووی گواستنەوە هەندێک جار تا ٦٠٠٪ زیادی کردووە.
ناوبراو زیادی کرد ئەگەرچی لە مانگی ڕابردوودا بازرگانی لە ڕێگەی ئێمارات و قەتەرەوە باشتر بووە، بەڵام تێچووی گواستنەوە هێشتا ٢ تا ٢.٥ قاتی ئاساییە.
ئەو بەربەستە دەریاییانەی بەسەر کۆماری ئیسلامیدا سەپێنراون، دەرئەنجامی هێرشەکانی سپای تێرۆریستیی پاسداران بۆ سەر کەشتییەکان لە کەنداو و گەرووی هۆرمۆز بوون.
