دونالد ترامپ، سەرۆککۆماری ئەمریکا ڕۆژی یەکشەممە لە چاوپێکەوتنێکدا لەگەڵ "فاکس نیوز" ڕایگەیاند کە ئەگەر تاران دەستی بە چەکی ئەتۆمی بگەیشتایە بەکاری دەهێنا و ئەگەری هەبوو ئیسرائیل و بەشێکی گەورەی ڕۆژهەڵاتی نێوەڕاست وێران ببن.
ناوبراو هۆشداریی دا کە بەدوای ئەوەدا بە ئەگەری زۆرەوە ئەمریکا یان ئورووپا دەبوونە ئامانجی دواتری ئێران.
ترامپ جەختی کردەوە: "ئەگەر چەکی ئەتۆمییان هەبووایە، دەیانتەقاند. نابێت بە هیچ شێوەیەک ڕێگەیان پێ بدرێت ببنە خاوەنی چەکی ئەتۆمی و نابنیش."
سەرۆککۆماری ئەمریکا هەروەها ستایشی سەرکەوتنی گەمارۆی بەندەرەکانی ئێران و هەڵمەتی گوشاری دارایی واشنگتۆنی کرد و ئاماژەی بەوە کرد کە ئێران بووەتە ڕێژیمێکی شکستهێناو.
ترامپ وتی: :هێزی دەریاییان لەنێو چوو، هێزی ئاسمانییان لەنێو چوو، ڕێبەرەکانیان لەنێو چوون، تەواوی بەرگریی ئاسمانییان لەنێو چوو. گەمارۆکە و ئەو زیانە داراییانەی پێمان گەیاندوون بڕواپێنەکراو بوون."
لە کۆتاییدا ترامپ ئاماژەی بەوە دا کە لە دەستپێکی شەڕەوە و هێرشەکانی تاران بۆ سەر عەرەبستان، قەتەر، ئیمارات، بەحرەین و کوەیت سەرسام بووە، بەڵام جەختی کردەوە کە ئەم هێرشانە بوونە هۆی ئەوەی ئێران تەواوی پشتگیریی ناوچەیی خۆی لەدەست بدات.
