بەسیجکردنی بەرین و بێوێنەی ئامراز و سەروەت و سامانی گشتی لەلایەن کۆماری ئیسلامییەوە بۆ ڕێوڕەسمی حکوومەتی ئەربەعەین، خزمەتگوزارییە سەرەتاییەکانی لە زۆربەی ناوچەکانی ئێراندا تووشی ئاڵۆزی و پەکخستن کردووە.
ڕاپۆرتەکان ئاماژە بەوە دەکەن کە ئاسانکاری و تەرخانکردنی کەلوپەلی دەوڵەتی بەم ڕووداوە، گوشارێکی زۆری خستووەتە سەر کەرتەکانی تەندروستی، گواستنەوە و دابینکردنی خۆراکی هاووڵاتییان.
لە شارە جیاوازەکاندا، تەواوی سیستمی گواستنەوەی نێوان شارەکان بە زۆر وەک کەرەستەی گواستنەوەی زیارەتکاران تەرخان کراون، بەمەش هاتوچۆی هاووڵاتییانی ئاسایی تووشی کێشە بووە.
هاوکات لە ناوچەکانی وەک خوڕماوا و ئەلیگودەرز، ناردنی بەشێکی بەرچاو لە ئارد، هێلکە و کەلوپەلە بنەڕەتییەکان بۆ بنکەکانی خزمەتگوزاریی ڕێژیم لە عێراق، بووەتە هۆی کەمبوونەوەی بەرچاوی خۆراک، گرانی و ناڕەزایەتیی بەرینی خەڵک.
ئەم بارودۆخە لە کاتێکدایە کە کەرتەکانی دەرمان لە نێوخۆی ئێران بەدەست کەمیی بەرچاوی دەرمانە گرنگەکانەوە دەناڵێنن، کەچی دەرمان و کەرەستەی پزیشکیی فراوان ڕەوانەی دەرەوە کراون.
چەندین پارێزگاش لەوانە کرماشان و ئیلام بەهۆی نەبوونی کۆنتڕۆڵ و گوشاری سەر وێستگەکانی وزە بەناچار کراونەتە پشوو.
ئەم هەنگاوانەی ڕێژیم جارێکی دیکە دەریخست کە چۆن سەرچاوە نیشتمانییەکان لەپێناو بەدیهێنانی مانۆڕی ئیدیۆلۆژیدا دەکرێنە قوربانی و مافە سەرەتاییەکانی هاووڵاتییان پێشێل دەکرێن.
