ئەمڕۆ چوارشەممە ٢٥ی خەرمانان، خەڵکی کوردستان بەدەم بانگەوازی هاوپەیمانیی هێزە سیاسییەکانی کوردستانی ئێرانەوە هاتن و بە داخستنی دووکان و بازاڕەکان مانیان گرت.
بەپێی ئەو زانیارییانەی هەتا ئێستا بە بەشی هەواڵی ناوەندی ڕاگەیاندنی حیزبی دێموکراتی کوردستانی ئێران گەیشتووە، مەهاباد، بۆکان، سەقز، مەریوان، پەسوێی پیرانشار و میاندواو لە مانگرتندان.
شاری بناویش پەیوەستی مانگرتنەکەی کوردستان بوو.
بەپێی زانیارییەکان شاری بانەش لە ئێستادا لە مانگرتندایە.
لە شاری سنەش دووکان و بازاڕەکان داخراون و مانگرتنەکە بەباشی بەڕێوە دەچێت.
هەروەها لە شاری گوێکتەپەی مەهاباد پێشوازییەگی گەرم لە مانگرتنەکە کراوە.
لە شاری دیواندەرەش دووکان و بازاڕەکان داخراون و پەیوەستی مانگرتنەکە بوون.
هەروەها لە شاری کامێران بە تەواوی دووکاندار و بازاڕییان دووکانەکانیان داخستووە و لە مانگرتندان.
مانگرتنی سەرانسەریی کوردستان لە شاری شنۆش بەڕێوە دەچێت.
هەروەها لە شاری ماکۆیش ئەمڕۆ ٢٥ی خەرمانان بازاڕییان و دووکانداران مانیان گرت.
لە گەورەشاری کوردستان شاری کرماشان، بازاڕییان بە داخستنی دووکانەکانیان بەدەم بانگەوازی مانگرتنی گشتیی هاوپەیمانیی هێزە سیاسییەکانی کوردستانی ئێرانەوە هاتن.
هەروەها لە شاری ورمێ گەورەشاری دیکەی ڕۆژهەڵاتی کوردستان، لە چەندین گەڕەکی گەورە مانگرتن بەڕێوە دەچێت و بازاڕەکان داخراون.
هاوپەیمانیی هێزە سیاسییەکانی کوردستانی ئێران بە بڵاوکردنەوەی بانگەوازێک، داوای لە خەڵکی کوردستان کرد کە ئەمڕۆ چوارشەممە ٢٥ی خەرمانان، لە چوارەمین ساڵوەگەڕی شەهیدکرانی ژینا ئەمینیدا، بە داخستنی بازاڕ و دووکانەکان مان بگرن.
