وێنە نوێیە ماهوارەییەکان نیشانی دەدات کە ڕێژیمی ئێران ئاستی ڕێکارە ئەمنییەتی و ڕێکخستنەوەکانی لە دەوروبەری بنکە ئەتۆمییە گوماناوییەکانی بەرز کردووەتەوە؛ دامەزراوەی زانست و ئەمنییەتی نێودەوڵەتی ئەم جووڵانەی بە زۆر جێگەی نیگەرانی وەسف کردووە.
بەپێی ڕاپۆرتی دامەزراوەی زانست و ئەمنییەتی نێودەوڵەتی، کۆماری ئیسلامی بەپەلە سەرقاڵی نوژەنکردنەوەی بنکەی "تاڵەقان ۲" لە کۆمەڵەی سەربازیی پارچین و قایمکردنی توانای بەرگریی دەوروبەری دامەزراوەی ژێرزەوینیی "کێوی پیکاکس"ە.
لە وێنە ئاسمانییەکاندا ئامادەیی بەربڵاوی کامیۆن، بۆڵدۆزێر و میکسەری سیمان لە تاڵەقان ۲ بینراوە، هاوکات بۆ شاردنەوەی چالاکییەکان لە چاوی ماهوارەکان، بەشە وێرانبووەکەی ژێر زەوی داپۆشراوە.
بنکەی تاڵەقان ۲ کە پێشتر لە ئۆکتۆبری ٢٠٢٤ لەلایەن ئیسرائیل و لە مارسی ٢٠٢٦ لەلایەن ئەمریکاوە کراوەتە ئامانج، لە بەڵگەنامە ئەتۆمییەکاندا وەک شوێنی توێژینەوەی چەکی ئەتۆمیی پێش ساڵی ٢٠٠٤ ناوی هاتووە.
هەروەها لە دەوروبەری تەپۆڵکەکانی کێوی پیکاکس لە نزیک نەتەنز، ڕێژیم سەنگەربەندیی نوێی بۆ بەرەنگاربوونەوەی بۆمبی سەنگەرشکێن دروست کردووە.
بەپێی هەڵسەنگاندنی هەواڵگریی ئیسرائیل، دوای شەڕی ١٢ ڕۆژە، ئێران هەزاران سانتریفیوژی پیتاندنی بۆ ئەم تۆڕە ژێرزەوینییە (کە ٩٠ تا ١٣٧ میتر لە ژێر بەردی ڕەقدایە) گواستووەتەوە.
زیادبوونی ئەم جموجۆڵانە کاردانەوەی توندی نێودەوڵەتیی لێ کەوتووەتەوە؛ دۆناڵد ترامپ، سەرۆککۆماری ئەمریکا هۆشداریی داوە کە "ئاگاداری چالاکییەکانی کێوی پیکاکس هەین و بە توندی وڵامی هەر هەنگاوێکی نەشیاو دەدەینەوە."
هاوکات ڕافائێل گرووسی، بەڕێوەبەری گشتیی ئاژانسی نێودەوڵەتیی وزەی ئەتۆم ڕایگەیاندووە کە بەهۆی ڕێگەنەدانی کۆماری ئیسلامی بە پشکێنەران، ئاژانس زانیارییەکی وردی لەسەر چالاکییەکانی ناو ئەو تۆنێلانە لە بەردەستدا نییە.
