"مەتیوو ویتاکێر"، باڵوێزی ئەمریکا لە ڕێکخراوی ناتۆ ڕایگەیاند، گەمارۆ دەریایی و سزاکانی واشنگتۆن، ئێرانیان بەتەواوی مایەپووچ و دەستبەتاڵ کردووە و دەسەڵاتدارانی تاران ئیتر ناتوانن لەسەر ئەم ڕێبازەی ئێستایان بەردەوام بن.
ویتاکێر لە وتووێژێکدا لەگەڵ کاناڵی "فاکس بیزینس"، ئاماژەی بەوە کرد کە ئەو و دۆناڵد ترامپ، سەرۆککۆماری ئەمریکا هاوڕان لەسەر ئەوەی گەمارۆ سەربازی و ئابوورییەکانی ئەم دواییەی واشنگتۆن، کۆماری ئیسلامیی ئێرانیان گەیاندووەتە لێواری داڕمانی تەواوەتیی ئابووری.
باڵوێزی ئەمریکا لە ناتۆ داوای لە تاران کرد بە زوویی ڕێگەی داماڵینی چەکی ئەتۆمی بگرێتە بەر، هێرشەکان ڕابگرێت و لەگەڵ واشنگتۆن بگاتە ڕێککەوتن.
ویتاکر جەختی کردەوە ئێران بە نزیكەی ٩٠ میلیۆن حەشیمەتەوە دەتوانێت ببێتە کۆمەڵگەیەکی پێشکەوتوو، بەڵام دەسەڵاتدارانی ئەو وڵاتە لە ٤٧ ساڵی ڕابردوودا ڕێگەیەکیان هەڵبژاردووە کە تەنیا مەینەتی و ماڵوێرانیی بۆ خەڵکەکەی بەدوای خۆیدا هێناوە.
