مارک ڕووتە، سکرتێری گشتیى ناتۆ ڕایگەیاند ئورووپا توانای پێویستی بۆ لەنێوبردنی توانای ئەتۆمیی کۆماری ئیسلامی نەبوو و کردەی سەربازیی ئەمریکا دژی تاران "تەواو پێویست" بوو. لە هەمان کاتدا جەختی لەوە کردەوە کە دەبێت وڵاتانی ئورووپایی لە داهاتوودا توانای بەڕێوەبردنی ئەم جۆرە ئۆپەراسیۆنانەیان بەبێ پشتبەستن بە ئەمریکا هەبێت.
ڕووتە لە "کۆبوونەوەی بەرگری و بۆشایی"ی یۆرۆنیوز لە برووکسێل وتی: "با ڕاستییەکە قەبووڵ بکەین؛ ئورووپا توانای ئەوەی نەبوو بەرنامەی ئەتۆمیی ڕێژیمی ئێران تێکبشکێنێت. ۱۰ ساڵی تر ئەم توانایەمان دەبێت و دەبێت پێشی بگەین."
سکرتێری گشتیى ناتۆ ئاماژەی بەوەش کرد کە هەمان بنەما بۆ بەرەنگاربوونەوەی حوسییەکانی سەر بە کۆماری ئیسلامی لە دەریای سووردا دەگونجێت و وتی: "نەدەبوو ئەمریکاییەکان ئەم ئەرکە بگرنە ئەستۆ، بەڵکوو دەبوو ئێمە بین."
ناوبراو بە دانپێدانان بە دەرئەنجامەکانی ئۆپەراسیۆنە سەربازییەکەی ئەمریکا جەختی کردەوە کە هەڵسەنگاندنەکان دەبێت لەسەر ئەو کۆڵەکەیە بن کە کردەکەی واشنگتۆن ئەرێنی بووە: "من لەو کەسانەم کە بڕوام وایە ڕووبەڕووبوونەوەی ئەمریکا لەگەڵ ئێراندا زەرورەتێکی پێویست بوو."
