لە درێژەی هەڵمەتی "گۆشەگیرکردنی ئابووری"دا، وەزارەتی دارایی ئامریكا توندترین سزای خستە سەر دوو کەرتە شادەمارییەکەی ئابووریی کۆماری ئیسلامی و شیرکەتە زەبەلاحەکانی ماشینسازی و هێڵی ئاسنینی خستە لیستی سزاکانییەوە.
نووسینگەی کۆنتڕۆڵی سەرمایە بیانییەکانی وەزارەتی دارایی ئامریکا ڕایگەیاند کە بەپێی فەرمانی جێبەجێکاریی ۱۳۹۰۲، لەمەدوا هەرجۆرە چالاکییەک لە کەرتەکانی ماشینسازی و گواستنەوەی هێڵی ئاسن لە ئێراندا، ڕاستەوخۆ دەبێتە ئامانجی سزادان.
ئەم سزادانە ئابوورییە شیرکەتە گەورەکانی وەک "ئێران‌خۆدرۆ"، "سایپا"، "پارس‌خۆدرۆ"، "زامیاد"، "هێپکۆ" و "شیرکەتی هێڵی ئاسنینی کۆماری ئیسلامی"، "شیرکەتی شەمەندەفەری ڕەجا" و "شیرکەتی هێڵی ئاسنینی گواستنەوە و گەیاندن"ی گرتووەتەوە.
هەروەها، جگە لەوەش تۆڕێک لە شیرکەتە پشتیوانەکانی ڕێژیم لە وڵاتانی چین، تورکیە، ئێمارات، ئاڵمان و ئەندۆنێزی خراونەتە لیستی سزاکانی ئەمریکاوە.
لەلایەکی دیکەوە، دوو کەسی سەر بە ڕێژیم بەناوەکانی، ڕامین کشوەردووست و مەهنووش پوورسەڕاف هەمەدانی، خرانە ناو لیستی سزاکانەوە.
سکات بێسێنت، وەزیری زەخێنەداریی ئامریکاش جەختی کردەوە کە ئامانجی ئەم پەلامارە ئابوورییە، وشککردنی تەواوەتیی سەرچاوە داراییەکانی "ماشینی شەڕ و تۆقاندن"ی تارانە.
بەم ڕێکارە، هەر دامەزراوەیەکی دارایی یان شیرکەتێکی دەرەکی کە ئاڵوگۆڕی بازرگانی لەگەڵ ئەم کەرتە ئیفلیجکراوانەدا بباتە پێش، تووشی بڕینی پەیوەندی و سزای لاوەکی دەبێتەوە.
