لە ئەنجامی بارینی تەرزە و هەورەبرووسکە لە ناوچەکانی سەر بە شارۆچکەی ماکۆ، زیانی ماددیی زۆر بە ئاژەڵداران کەوتووە و ١٥٠ سەر مەڕوماڵاتی هاوڵاتییان مردار بوونەتەوە.
شەهلا تاجفەر، فەرمانداری ماکۆ ڕایگەیاند کە لێزمەباران و هەورەبرووسکە لە ناوچەی بازرگان و نزیک گوندەکانی "مەلهەم" و "گوڵئالی"، زیانێکی زۆری بە ژێرخان و سامانی هاووڵاتییان گەیاندووە.
فەرمانداری دەستنیشانکراوی ڕێژیم لە ماکۆ ئاشکرای کردووە لەم ڕووداوەدا ١٥٠ سەر مەڕوماڵاتی ئاژەڵدارانی ناوچەکە مرداربوونەتەوە و ٣٠ سەری دیکەش بریندار بوون.
ناوبراو ئاماژەی بەوەش داوە کە ڕێگەی پەیوەندیی "بازرگان" بۆ "بۆرالان" و هەندێک لە بینا و ژێرخانەکانی ناوچەکە زیانیان بەرکەوتووە و کۆی گشتیی خەسارە داراییەکان بە ٥ میلیارد تمەن مەزەندە کراوە.
نەبوونی ژێرخانی گونجاو و ئامادەکاریی پێشوەختە بۆ ڕووبەڕووبوونەوەی کارساتە سروشتییەکان لە ڕۆژهەڵاتی کوردستان، ساڵانە چەندین میلیارد تمەن خەسار بە ئاژەڵداران و جووتیارانی ناوچەکە دەگەیەنێت بێ ئەوەی ناوەندە پەیوەندیدارەکانی ڕێژیم هیچ قەرەبوویەکی زیانپێکەوتووان بکەنەوە.
